Rreth 300 qiramarrës në Cyrih mbeten në pritje: Vonesat në ndërtim ua prishin planet e zhvendosjes

Rreth 300 qiramarrës që planifikonin të vendoseshin në banesat e reja në kompleksin Koch-Areal, në lagjen Altstetten të Cyrihut, janë përballur me një shtyrje të papritur të afatit të hyrjes. Vonesat në furnizimin me pjesë të rëndësishme të ndërtesave kanë vënë në pikëpyetje planet e zhvendosjes për qindra banorë, përcjell albinfo.ch.

Në hapësirën e ish-kompanisë Koch Wärme AG po ndërtohet një kompleks i madh banimi, i cili synon të ofrojë banesa me qira më të përballueshme. Megjithatë, projekti është përballur me probleme serioze në fazën përfundimtare të punimeve, duke bërë që një pjesë e banesave të mos jenë gati sipas planit fillestar.

Sipas Anna-Katharina Ris, përgjegjëse për komunikim në kooperativën e banimit Kraftwerk1, dy shkallë të ndërtesave pritet të përfundojnë me deri në gjashtë javë vonesë, ndërsa për një tjetër parashikohet shtyrje prej dhjetë deri në dymbëdhjetë javësh. Vetëm njëra nga katër shkallët është sipas planit.

Arsyet e hollësishme të vonesave në furnizim nuk janë bërë të ditura nga kooperativa. Ndërkohë, menaxhmenti i ndërtimit po rishikon afatet dhe pritet t’u komunikojë banorëve datat e reja të hyrjes sa më shpejt që të jetë e mundur.

Shumë familje rrezikojnë të mbeten pa banesë

Situata është veçanërisht shqetësuese për ata që tashmë kanë njoftuar ndërprerjen e kontratave të qirasë në banesat aktuale, me përfundim në fund të tetorit. Për shkak të shtyrjes së papritur, ata duhet të gjejnë një zgjidhje të përkohshme për strehim.

Fillimisht, hyrja në kompleksin e ri, i cili përfshin 123 banesa për rreth 450 persona, ishte planifikuar të bëhej gradualisht nga fundi i tetorit deri në fund të shkurtit 2027. Vonesat e reja e kanë bërë të nevojshëm riorganizimin e këtij kalendari.

Kooperativa Kraftwerk1 ka nisur kërkimin e zgjidhjeve alternative për të prekurit. Përmes bashkëpunimit me kooperativa të tjera të banimit, deri më tani janë siguruar 60 banesa që mund të përdoren përkohësisht.

Disa nga qiramarrësit e ardhshëm kanë gjetur ndërkohë alternativa individuale, duke përfshirë qëndrimin përkohësisht te familjarët apo miqtë, si dhe zgjatjen e kontratave aktuale të qirasë.

Sipas kooperativës, synimi është që për secilin prej banorëve të sigurohet një zgjidhje e ndërmjetme deri në momentin kur banesat e reja të jenë gati për përdorim.

Kompensimi për shpenzimet shtesë ende duhet të sqarohet

Përveç vështirësive praktike, vonesat mund t’u shkaktojnë qiramarrësve edhe shpenzime të paplanifikuara, si për strehimin e përkohshëm, ashtu edhe për transportin apo zhvendosjen.

Kraftwerk1 ka bërë të ditur se kostot shtesë të shkaktuara nga vonesat do të shqyrtohen sipas parimit të proporcionalitetit. Megjithatë, mënyra konkrete e trajtimit të kërkesave për kompensim ende nuk është përcaktuar.

Banorëve u është kërkuar që të ruajnë dhe dokumentojnë dëshmitë për shpenzimet shtesë, në mënyrë që ato të mund të shqyrtohen nga kooperativa.

Për qindra qiramarrësit, sfida kryesore mbetet gjetja e një strehimi të sigurt deri në përfundimin e punimeve dhe përcaktimin e afateve të reja për hyrjen në kompleksin e banimit. /Albinfo.ch

The post Rreth 300 qiramarrës në Cyrih mbeten në pritje: Vonesat në ndërtim ua prishin planet e zhvendosjes appeared first on Albinfo.

Burimi i lajmit: albinfo.ch
Shënim: Ky material është përpunuar për qëllime informimi nga Portali Kosova.Today.