Sekretarja Cooper në Këshillin e OKB: Britania dhe NATO, të gatshme të përballen me avionët rusë në hapësirën ajrore të Evropës

Sekretarja e Jashtme e Mbretërisë së Bashkuar, Yvette Cooper, ka dhënë një paralajmërim të qartë ndaj Rusisë gjatë fjalës së saj në Këshillin e Sigurimit të OKB-së në Neë York, duke deklaruar se Britania dhe aleatët e saj të NATO-s janë të gatshëm të përballen me avionët rusë që shkelin hapësirën ajrore të NATO-s.

“Nëse do të jetë e nevojshme të përballemi me avionë që operojnë në hapësirën ajrore të NATO-s pa leje, do ta bëjmë këtë,” tha Cooper.

Ajo i përshkroi veprimet e fundit të Rusisë si “në rastin më të mirë, të rrezikshme dhe të pamenduara”, ndërsa në rastin më të keq, si “një përpjekje e qëllimshme për të minuar integritetin territorial të kombeve sovrane dhe sigurinë evropiane.”

“Veprimet e tilla rrezikojnë llogaritjet e gabuara dhe hapin derën për një përballje të drejtpërdrejtë ushtarake mes NATO-s dhe Rusisë,” paralajmëroi ajo.

Cooper theksoi solidaritetin e palëkundur të Mbretërisë së Bashkuar me aleatët e saj, duke u shprehur:

“Mbretëria e Bashkuar qëndron në solidaritet të plotë me ju – tani dhe gjithmonë.”

Duke iu drejtuar drejtpërdrejt Presidentit Putin, ajo tha:

“Veprimet tuaja të pamatura rrezikojnë një përplasje të drejtpërdrejtë me NATO-n. Aleanca jonë është mbrojtëse, por mos keni asnjë iluzion – jemi të gatshëm të ndërmarrim çdo hap të nevojshëm për të mbrojtur hapësirën ajrore dhe territorin e NATO-s.”

“Jemi vigjilentë. Jemi të vendosur,” përfundoi Cooper deklaratën e saj.

Deklaratat e Cooper vijnë në një kohë tensionesh të shtuara mes Rusisë dhe aleancës ushtarake perëndimore, pas raporteve për shkelje të përsëritura të hapësirës ajrore nga avionë rusë pranë kufijve të NATO-s.  / abcnews.al /