SHBA: Numërimi mbrapsht për lirimin e pengjeve ka filluar

I dërguari i Donald Trump në Lindjen e Mesme, Steve Witkoff, ka thënë se SHBA ka “konfirmuar” se Izraeli ka “përfunduar fazën e parë të tërheqjes në vijën e verdhë”.

“Periudha 72-orëshe për lirimin e pengjeve ka filluar”, shtoi ai.

Në Gaza, zëdhënësi ushtarak i Izraelit i ka paralajmëruar banorët të shmangin zonat nën kontrollin e vendit të tij.

“Unë po u bëj thirrje banorëve të Gazës që të shmangin hyrjen në zonat nën kontrollin e IDF-së. Përmbajuni marrëveshjes dhe siguroni sigurinë tuaj”, tha Gjenerali i Brigadës Effie Defrin.

Ndryshe, dhjetëra mijëra palestinezë janë nisur drejt Gazës veriore pasi ushtria izraelite njoftoi se një marrëveshje armëpushimi kishte hyrë në fuqi.

Fillimi i ofensivës së Izraelit në Gaza pas një sulmi të Hamasit më 7 tetor ka bërë që rreth një milion palestinezë të largohen nga pjesa veriore e rajonit. Tërheqja fillestare e forcave izraelite nga pjesë të Qytetit të Gazës , e cila filloi sot, zbuloi shkallën e tmerrshme të shkatërrimit të lagjeve të banimit dhe infrastrukturës kyçe.