Studimi: Ekstrakti i kanabisit lehtëson dhimbjen e mesit pa shkaktuar varësi

Një ekstrakt i marrë nga bima e kanabisit është zbuluar se ndihmon në lehtësimin e dhimbjes kronike të pjesës së poshtme të shpinës pa shkaktuar varësi, sipas një studimi të publikuar së fundmi në revistën shkencore Nature Medicine.

Studiuesit e përshkruajnë këtë si trajtimin e parë të dhimbjes kronike që është i provuar klinikisht dhe pa rrezik varësie, i bazuar në përbërës të nxjerrë nga kanabisi. Ata e konsiderojnë këtë zbulim si një strategji premtuese klinike për menaxhimin e dhimbjes, pa efektet anësore që lidhen zakonisht me përdorimin e ilaçeve të forta si opioidet.

“Duke pasur parasysh përhapjen e lartë të dhimbjes kronike të mesit dhe krizën globale të opioideve, këto të dhëna theksojnë një mundësi premtuese për menaxhimin e dhimbjes pa varësi”, thanë studiuesit.

Në provën klinike morën pjesë 820 të rritur, të cilët iu nënshtruan një trajtimi 12-javor me ekstraktin VER-01. Sipas rezultateve, pjesëmarrësit raportuan një ulje të ndjeshme të nivelit të dhimbjes, ndërsa gjatë një zgjatjeje 6-mujore të studimit u vu re edhe një përmirësim i mëtejshëm i simptomave.

Sipas studiuesve nga një shkollë mjekësore në Hanover të Gjermanisë, ekstrakti VER-01 u tolerua mirë nga pjesëmarrësit, me efektet anësore më të zakonshme që përfshinin marramendje të lehtë, përgjumje të tepërt dhe nauze, sidomos gjatë fazave të para të trajtimit.

Për më tepër, nuk u vunë re shenja të rritjes së dozës, abuzimit, varësisë apo simptoma të tërheqjes, çka e bën këtë trajtim një alternativë të mundshme ndaj opioideve, të cilat janë të njohura për efektet e forta anësore dhe rrezikun e lartë të varësisë.

“Rezultatet tregojnë se VER-01 ka aftësinë të lehtësojë dhimbjen pa sjellë pasojat e rënda që zakonisht lidhen me përdorimin e opioideve”, përfunduan studiuesit.