Transparencë celulare: Studenti që krijoi hartën e antenave në Zvicër

Një student nga Valais, Leutrim Shallti, ka zhvilluar një hartë digjitale që tregon me saktësi vendndodhjen dhe teknologjinë e çdo antene celulare në Zvicër, duke ofruar një mjet të fuqishëm transparence për konsumatorët dhe duke vënë në siklet operatorët e mëdhenj të telekomunikacioni, përcjell albinfo.ch.

Pavarësisht se nuk është ekspert i fushës – Shallti studion psikologji – ai ka arritur të krijojë carteantennesuisse.ch, një platformë që rendit të gjitha antenat në vend. Çdo pikë në hartë përmban informacione si: emri i operatorit, teknologjitë e disponueshme (3G/4G/5G), drejtimi i sinjalit dhe frekuencat e përdorura.

“Nëse një kompani si Salt thotë se ka mbulim 5G në zonën tuaj, tani ju mund të verifikoni vetë, në vend që të mbështeteni vetëm në fjalët e tyre,” thotë Shallti për televizionin zviceran RTS, ndërsa tregon një strukturë metalike që ai identifikon si një antenë të Salt me 3G/4G dhe 5G.

Një mjet i ri për vendime të informuara

Qëllimi i hartës është të fuqizojë përdoruesit, duke u dhënë atyre informacion të pavarur përpara se të bëjnë një zgjedhje mbi ofruesin e shërbimit celular. “Konsumatorët meritojnë transparencë. Nuk kanë më pse t’i besojnë verbërisht marketingut të kompanive,” shton ai.

Industria nuk është entuziaste

Por jo të gjithë janë të kënaqur me këtë nismë. Sipas Shalltit, operatorët shohin në këtë projekt një ekspozim të padëshiruar. “Është sikur t’i zhveshësh ata. Tani nuk kanë më sekrete – përveç fuqisë së transmetimit, të cilën ende nuk pranojnë ta bëjnë publike,” vëren ai.

Pavarësisht reagimeve, platforma e Leutrim Shalltit po fiton popullaritet si një shembull frymëzues i përdorimit të teknologjisë për transparencë dhe informim publik, i krijuar jo nga një korporatë, por nga një student me vullnet dhe vizion.

The post Transparencë celulare: Studenti që krijoi hartën e antenave në Zvicër appeared first on Albinfo.