Trump kërcënon Rusinë me sanksione/ Reagon Kremlini: Asnjë sanksion nuk ndryshon pozitat tona

Kremlini ka reaguar pas deklaratës së presidentit të SHBA-së, Donald Trump, i cili tha se ishte gati të vendoste sanksione të reja kundër Rusisë.

Në një përgjigje ndaj komenteve të Trump, Kremlini theksoi se Europa dhe Ukraina po bëjnë çdo gjë për të tërhequr SHBA-në në orbitën e tyre. Ata gjithashtu shtuan se asnjë sanksion nuk do të jetë në gjendje të ndryshojë pozitat e Rusisë.

Deklarata e Trump erdhi gjatë udhëtimit të tij drejt turneut të US Open, kur ai u pyet nëse ishte gati të kalonte në fazën e dytë të sanksioneve ndaj Moskës. Ai u përgjigj me një “Po” të shkurtër.

Më herët këtë javë, Sekretari i Thesarit të SHBA-së, Scott Bessent, kishte thënë se shtimi i presionit ekonomik nga Shtetet e Bashkuara dhe Europa mund të shtynte presidentin rus, Vladimir Putin, të hynte në bisedime për paqe me Ukrainën. “Jemi të gatshëm të rrisim presionin ndaj Rusisë, por kemi nevojë që partnerët tanë europianë të na bashkohen,” tha Bessent në një intervistë për programin “Meet the Press” të NBC News. / abcnews.al /