Vala e nxehtësisë nga Afrika godet Kosovën, javën e ardhshme temperaturat do të jenë mbi mesataren

Instituti Hidrometeorologjik i Kosovës (IHMK) ka njoftuar se gjatë javës së ardhshme, nga 21 deri më 25 korrik, do të përjetohet një periudhë e jashtëzakonshme me temperatura të larta. Kjo valë nxehtësie është shkaktuar nga masa të ajrit të thatë dhe shumë të nxehtë që vijnë nga Afrika Veriore, konkretisht nga rajoni i Saharasë.

Në njoftimin zyrtar të IHMK-së thuhet se një presion i lartë atmosferik në zonën qendrore dhe jugore të Mesdheut ka krijuar kushtet për rrjedhjen e një mase ajrore subtropikale kontinentale drejt Ballkanit, duke sjellë kështu këtë valë të nxehtësisë verore, përcjell albinfo.ch.

Ky fenomen do të karakterizohet nga temperatura shumë të larta që pritet të tejkalojnë vlerat mesatare për këtë periudhë të vitit. Përveç kërcënimit ndaj shëndetit të njerëzve, moti i nxehtë sjell edhe rreziqe për mjedisin dhe sektorin e bujqësisë.

IHMK njofton se kjo periudhë zakonisht shoqërohet me ulje të reshjeve dhe rritje të ndjeshme të temperaturave, duke rritur rrezikun për thatësirë dhe zjarre në pyje dhe fusha bujqësore.

Gjithashtu, Instituti paralajmëron një indeks të lartë të rrezatimit UV, duke këshilluar qytetarët që të shmangin ekspozimin e drejtpërdrejtë në diell, veçanërisht nga ora 09:00 deri në 17:00. Grupet më të rrezikuara mbeten të moshuarit, fëmijët dhe personat me sëmundje kronike, ndaj edhe bëhet apel për kujdes maksimal gjatë këtyre ditëve për të parandaluar goditjet nga të nxehtit dhe dehidratimin.

The post Vala e nxehtësisë nga Afrika godet Kosovën, javën e ardhshme temperaturat do të jenë mbi mesataren appeared first on Albinfo.