Zëri i Anila Aliut jehon në Gotham Hall, performancë në Gala-në e AARC 2025

Një tjetër emër i artit shqiptar po shkëlqen në arenën ndërkombëtare. Anila Aliu, këngëtare me zë të veçantë dhe prezencë skenike mbresëlënëse, ka përfaqësuar me dinjitet dhe klas Shqipërinë në Gala-në e Këshillit të Marrëdhënieve Shqiptaro-Amerikane (AARC), mbajtur në Nju-Jork, shkruan albinfo.ch.

Gjatë mbrëmjes gala të vitit 2025, e cila u zhvillua në ambientet prestigjioze të Gotham Hall, Anila Aliu emocionoi të pranishmit me interpretimin e himnit shqiptar dhe atij amerikan, në një performancë që simbolizoi miqësinë dhe bashkimin e kulturave.

Në këtë aktivitet morën pjesë presidentë, ambasadorë, përfaqësues diplomatikë, si dhe kryetari i Bashkisë së New York-ut, Eric Adams, bashkë me personalitete të njohura të komunitetit shqiptar në Shtetet e Bashkuara.

“Pata nderin të performoja në Gala Mbrëmjen AARC në Gotham Hall, New York — një ngjarje që mblodhi presidentë, ambasadorë, kryetarin e Bashkisë së New York-ut Eric Adams, dhe shqiptarë e liderë që kanë arritur majat në Shtetet e Bashkuara. Hapja e mbrëmjes me himnin kombëtar të SHBA, e më pas interpretimi i veprave shqiptare dhe ndërkombëtare, ishte një përgjegjësi dhe nder i jashtëzakonshëm për mua si soliste. Thellësisht mirënjohëse për këtë mundësi dhe gati për performancën e radhës në Nju Jork, më pas vijon koncerti me orkestër në Çikago,” është shprehur Anila Aliu.

Sipas Ambasadës Shqiptare në SHBA, Anila Aliu është “një talent që bashkon kulturat përmes muzikës”, duke dëshmuar se arti shqiptar vazhdon të zërë vend të denjë në skenat më të mëdha botërore. /Albinfo.ch

The post Zëri i Anila Aliut jehon në Gotham Hall, performancë në Gala-në e AARC 2025 appeared first on Albinfo.