Zvicër: Më shumë se një fëmijë në ditë preket nga aksidentet rrugore gjatë rrugës për në shkollë

Në vitin 2024, 455 fëmijë në Zvicër u përfshinë në aksidente rrugore gjatë udhëtimit për në shkollë, ose më shumë se një fëmijë në ditë, sipas statistikave kombëtare. Për të rritur sigurinë e fëmijëve dhe për të ulur numrin e aksidenteve, Touring Club Switzerland (TCS) ka nisur një fushatë të re kombëtare me sloganin “Vëzhgo, Ngadalëso, Ndalo”, e cila u drejtohet drejtpërdrejt përdoruesve të rrugës, shkruan RTS, transmeton albinfo.ch.

“Shkaqet kryesore të aksidenteve janë mungesa e vëmendjes ose refuzimi për të dhënë përparësi, veçanërisht në kalimet për këmbësorë”, shpjegoi Jordan Girod, zëdhënës i TCS. “Slogani i ri nënvizon rëndësinë e vigjilencës, ngadalësimit të shpejtësisë dhe ndalimit të automjeteve në kalimet për këmbësorë për të garantuar kalimin e sigurt të fëmijëve.”

TCS, në bashkëpunim me policinë, bashkitë, shkollat dhe prindërit, do të shpërndajë materiale të veçanta të fushatës, përfshirë sprej dhe aromatizues ajri për makinat. “Përdorimi i aromave të veçanta do të shërbejë si kujtesë nuhatëse për mesazhin e fushatës. Figura të personalizuara nga fëmijët do t’u shpërndahen prindërve për t’i vendosur në automjete, duke kombinuar aspektin emocional dhe atë të sigurisë,” shtoi Girod.

Një veçori e re e fushatës është mundësia për t’u regjistruar në njoftime përmes WhatsApp ose aplikacionit TCS. Përdoruesit e rrugës do të marrin mesazhe kujtese për praninë e fëmijëve në rrugë, të përshtatura sipas rajonit.

TCS thekson se fushatat e mëparshme për fëmijët, si “Ndalo, Shiko, Dëgjo, Kalo”, kanë ndihmuar në rritjen e ndërgjegjësimit për sigurinë rrugore, por numri i aksidenteve mbetet i qëndrueshëm, transmeton albinfo.ch.

The post Zvicër: Më shumë se një fëmijë në ditë preket nga aksidentet rrugore gjatë rrugës për në shkollë appeared first on Albinfo.