Zvicra me ndryshime të rëndësishme nga nëntori

Një nga ndryshimet kryesore hyn në fuqi më 1 nëntor, kur kompanitë ajrore do të detyrohen t’u transmetojnë autoriteteve federale të dhënat e pasagjerëve. Informacionet do të përfshijnë emrat, të dhënat e kontaktit, itineraret e udhëtimit dhe mënyrat e pagesës.

Këto të dhëna do t’i përcillen Policisë Federale Zvicerane (Fedpol), me qëllim identifikimin e personave të kërkuar ose që mund të paraqesin rrezik për sigurinë, përpara hyrjes apo daljes së tyre nga vendi.

Po më 1 nëntor hyn në fuqi edhe një rregullore e re për mbrojtjen e klimës, e cila përcakton mënyrën e reduktimit dhe kompensimit të emetimeve të gazeve serrë, shkruan The Local, transmeton albinfo.ch.

Letërnjoftime të reja biometrike nga 2 nëntori

Nga 2 nëntori, shtetasit zviceranë do të kenë mundësi të aplikojnë për letërnjoftimet e reja biometrike.

Dokumentet do të përmbajnë një çip elektronik me fotografinë e fytyrës dhe dy gjurmë gishtërinjsh, ngjashëm me pasaportat biometrike zvicerane.

Letërnjoftimet e reja synojnë të lehtësojnë udhëtimin e shtetasve zviceranë brenda Bashkimit Evropian. Ato nuk duhet të ngatërrohen me sistemin e veçantë të identitetit elektronik (e-ID), i cili është ende në zhvillim.

Sigurimet shëndetësore: Afati për ndërrim deri më 30 nëntor

Një nga datat më të rëndësishme për banorët e Zvicrës është 30 nëntori, afati i fundit për anulimin e sigurimit të detyrueshëm shëndetësor dhe kalimin te një kompani tjetër për vitin 2027.

Primet e sigurimit shëndetësor pritet të rriten mesatarisht me 5 për qind vitin e ardhshëm, ndërsa në disa kantone rritja do të jetë edhe më e lartë.

Personat që dëshirojnë të ndryshojnë kompaninë e sigurimit apo kushtet e policës së tyre duhet të ndërmarrin veprimet e nevojshme brenda afatit.

Autoritetet këshillojnë që sigurimi aktual të mos anulohet pa u siguruar më parë mbulimi nga një kompani tjetër. Gjithashtu, detyrimet e papaguara ndaj siguruesit aktual duhet të shlyhen.

Katër çështje të rëndësishme në referendumet e 29 nëntorit

Më 29 nëntor, qytetarët zviceranë do të dalin në votime për katër çështje që lidhen me pensionet, taksat, fishekzjarrët dhe eksportin e armatimit.

Një nga temat kryesore është financimi i pensionit të 13-të, për të cilin propozohet rritja e tatimit mbi vlerën e shtuar (TVSH) nga 8.1 në 8.5 për qind.

Qytetarët do të vendosin gjithashtu për kufizimin e përdorimit privat të fishekzjarrëve, një iniciativë që synon të reduktojë ndikimin e tyre te kafshët dhe mjedisi.

Çështja tjetër ka të bëjë me tatimin e çifteve të martuara, ndërsa votimi i katërt lidhet me ndryshimet në legjislacionin për eksportin e materialeve ushtarake.

Fushata shëndetësore dhe protesta gjatë nëntorit

Nga 2 deri më 7 nëntor, në Zvicër do të organizohet Java Kombëtare e Vaksinimit, gjatë së cilës qytetarët mund të marrin këshilla dhe vaksina kundër gripit sezonal, COVID-19 dhe, në raste të caktuara, virusit respirator RSV.

Për shkak të vonesave në furnizimin me vaksina, një javë e dytë vaksinimi është planifikuar nga 23 deri më 28 nëntor.

Ndërkohë, gjatë gjithë muajit do të zhvillohet fushata kombëtare kundër duhanpirjes, e cila synon të mbështesë personat që dëshirojnë ta ndërpresin këtë zakon.

Më 20 nëntor janë paralajmëruar edhe protesta të organizuara nga të rinjtë socialistë zviceranë, kundër politikave të militarizimit dhe masave të kursimit në Evropë.

Me këto zhvillime, nëntori pritet të jetë një muaj i rëndësishëm për banorët e Zvicrës, veçanërisht për ata që planifikojnë të ndryshojnë sigurimin shëndetësor, të aplikojnë për dokumente të reja identifikimi apo të marrin pjesë në referendumet federale.

The post Zvicra me ndryshime të rëndësishme nga nëntori appeared first on Albinfo.

Burimi i lajmit: albinfo.ch
Shënim: Ky material është përpunuar për qëllime informimi nga Portali Kosova.Today.