Autobusët pa shofer fillojnë qarkullimin në Aeroportin e Cyrihut

Prej disa ditësh, dy autobusë të vegjël (shuttle) plotësisht të automatizuar, pa shofer dhe pa personel sigurie, po qarkullojnë në ambientet e Aeroportit të Cyrihut.

Testimet e para u kryen në fillim të shtatorit, siç bëhet e ditur në një deklaratë të aeroportit teksa autobusët monitorohen nga një qendër kontrolli.

Kjo e bën Cyrihun një nga aeroportet e para në Evropë që realizon udhëtime të tilla. Projekti po zhvillohet në bashkëpunim me kompaninë kineze WeRide që nga marsi i vitit 2025. Aeroporti e cilëson këtë si një “arritje të rëndësishme”.

Megjithatë, për momentin pasagjerët nuk mund të hipin në këta autobusë të vegjël. Aktualisht, ata janë të destinuar të shërbejnë ekskluzivisht për transportin e punonjësve. Ata lëvizin në një itinerar të përcaktuar dhe nuk kalojnë nëpër pistat e lëvizjes së avionëve (taxiways), raporton Blick, transmeton albinfo.ch.

Ndërsa autobusët e kryejnë lëvizjen në mënyrë të pavarur, operacionin e mbikëqyrin punonjës të kompanive Swissport dhe Krummen Kerzers.

Mjetet nuk zëvendësojnë punonjësit. “Shoferët e mëparshëm të sigurisë janë trajnuar për këtë detyrë të re,” shkruan Aeroporti i Cyrihut. Automatizimi synon ta bëjë punën më efikase dhe gjithashtu të përballet me mungesën e pritshme të fuqisë punëtore të kualifikuar.

Autobusët do të përdoren të paktën deri në fund të vitit 2026. Aktualisht, aeroporti po shqyrton mundësinë e vazhdimit të projektit. Pavarësisht kësaj, të dhënat e mbledhura do të shërbejnë si bazë për përdorimin e ardhshëm të mjeteve të automatizuara – në të ardhmen, ndoshta edhe për pasagjerët e linjave ajrore.

The post Autobusët pa shofer fillojnë qarkullimin në Aeroportin e Cyrihut appeared first on Albinfo.

Burimi i lajmit: albinfo.ch
Shënim: Ky material është përpunuar për qëllime informimi nga Portali Kosova.Today.