“BALFIN Group” i Samir Manes blen godinën ikonike në “zemër” të Vjenës

Biznesmeni i njohur shqiptar, Samir Mane, ka realizuar një nga blerjet më të spikatura jashtë kufijve të Shqipërisë. Një ndërtesë ikonike në zemër të Vjenës, që daton nga viti 1872 dhe që dikur shërbente si një nga hotelet e para luksoze të qytetit, ka kaluar zyrtarisht në pronësi të plotë të BALFIN Group, korporatës së madhe investuese të themeluar nga Mane, transmeton albinfo.at.

Objekti, i njohur për arkitekturën e tij elegante dhe historinë e pasur, do t’i nënshtrohet një procesi të kujdesshëm restaurimi dhe transformimi. Samir Mane, përmes një postimi në rrjetet sociale, ka vënë në pah rëndësinë e këtij projekti për grupin që ai drejton.

“Ky objekt nuk është vetëm një ndërtim arkitektonik, është një dëshmi e kohës, një simbol i qëndrueshmërisë dhe i transformimit,” ka shkruar ai, duke shtuar se vizioni i BALFIN-it është që ndërtesës t’i rikthehet lavdia e dikurshme, duke ruajtur autenticitetin artistik dhe kulturor, por pa e penguar atë të funksionojë si një hapësirë bashkëkohore në ritmin e nevojave moderne të Vjenës.

Mane thekson se çdo element do të restaurohet me përkushtim, në funksion të një ideje më të madhe që e lidh të kaluarën me të ardhmen.

Ky investim shënon një tjetër hap strategjik në misionin e BALFIN Group për të krijuar vlera afatgjata, duke ndërtuar ura mes trashëgimisë kulturore dhe zhvillimit ekonomik, jo vetëm në rajon, por në një skenë gjithnjë e më globale. /Albinfo.at

The post “BALFIN Group” i Samir Manes blen godinën ikonike në “zemër” të Vjenës appeared first on Albinfo.