Berisha pranon për herë të parë se ka pak shanse për një proces kundër Blinken në Paris

Ish-kryeministri Sali Berisha për herë të parë ka pranuar se ka shanse të vogla që në Paris të nisë një proces gjyqësor ndaj Sekretarit amerikan të Shtetit, Antony Blinken.

I pyetur nga gazetarët gjatë konferencës për mediat se në cilën fazë është procesi, Berisha tha se ka shanse të vogla që një proces i tillë të nisë. Berisha e ka paditur Blinken për shpifje pasi Departamenti Amerikan i Shtetit e shpalli “non-grata” për pengim të drejtësisë dhe korrupsion madhor, për çka ish-kryeministri dhe ish-kryetari i PD-së pretendon se s’ka fakte.

Sipas Berishës, ngecja e procesit në Paris vjen për shkak se ai nuk është shtetas i BE-së dhe se Blinken ka imunitet.

“Për gjykatën e Parisit mund t’u them se çështja është në Kasacion. Por shanset, duke qenë se në të drejtën franceze nxirret si pretekst se unë nuk jam anëtar, qytetar i një vendi të BE-së, dhe se sekretari Blinken ka imunitet dhe nuk është në juridiksionin e gjykatave franceze, shanset e mija për të parë një rezultat në favor, pra nuk është se e hedhin poshtë shpifjen, ka probleme me kopetencën. Dhe unë tani pres vendimin dhe pastaj do të konsultohem prapë me specialistët e mi ligjorë për hapat e mëtejshme”, deklaroi Berisha.

The post Berisha pranon për herë të parë se ka pak shanse për një proces kundër Blinken në Paris appeared first on Newsbomb Albania.