Bie nga parashuta në Mal të Zi – dalin pamjet e momentit tragjik të modeles serbe

Një vajzë 19-vjeçare nga Serbia, Tijana Radonjic, humbi jetën në mënyrë tragjike pasi ra nga një lartësi prej mbi 50 metrash në Detin Adriatik, gjatë një fluturimi me parashutë në Budva javën e kaluar.

Sipas raportimeve të mediave lokale, ngjarja u regjistrua në video dhe tregon momentet e fundit të panikut të vajzës, ndërsa përpiqet me dëshpërim të çlirohet nga jeleku i shpëtimit dhe rripat e sigurisë.

Ajo dëgjohet duke thënë ‘më ulni poshtë’ pak çaste para se të bie nga lartësia e madhe.

Trupi i saj i pajetë u gjet më vonë në ujë nga ekipet e shpëtimit. Disa burime lokale spekulojnë se ajo mund të ketë pësuar një sulm paniku në ajër, që e çoi në këtë reagim të papritur.

Radonjic e pranoi udhëtimin pas një oferte falas nga një përfaqësues i kompanisë që ofronte shërbimin në plazh.

Pronari i kompanisë, Mirko Krdzic, tha për mediat: “Jemi të gjithë në shok. Ajo nuk shfaqi asnjë shenjë frike”.

Autoritetet janë duke zhvilluar hetime të plota mbi ngjarjen, përfshirë inspektimin teknik të pajisjeve dhe pritjen e rezultateve të autopsisë.

Ngjarja ka ngjallur reagime të forta dhe pyetje serioze mbi masat e sigurisë, përgatitjen psikologjike të pjesëmarrësve dhe përgjegjësinë e kompanive që ofrojnë aktivitete ekstreme turistike.