Bytyqi: Qytetarët nuk marrin asgjë nga promovimi i investimit me parkun e erës

“E vërteta është se negociatat nuk kanë filluar as kanë përfunduar, ky është një paralajmërim për një investim, i cili ende do të duhet të menaxhohet institucionalisht, për t’iu përgjigjur të gjitha pyetjeve të hapura”, tha deputeti i LSDM-së Fatmir Bytyqi në emisionin “Win-Win”, në televizionin Telma, duke komentuar investimin e “Alcazar Energy” të paralajmëruar nga kryeministri Hristijan Mickoski, përcjell FLAKA.

Bytyqi theksoi se fondi i investimeve nuk është investitori i vërtetë, publiku ende duhet të zbulojë se kush qëndron pas tij.

“Fondi po mbledh fonde, nuk ka asnjë garanci që do të sigurojnë mjete financiare deri në fund të vitit 2025 për të nisur projektin, i cili do të fillojë diku në vitin 2026. Duke ditur se sa kohë duhet për të ndërtuar parqe me erë, projeksioni im është që në vitin 2030 të ketë një fund të këtij projekti”, tha Bytyqi dhe sqaroi se marketingu politik nuk duhet bërë sepse qytetari nuk merr asgjë nga vetë promovimi.

Duke folur për qasjen e Qeverisë së kaluar të udhëhequr nga LSDM-ja ndaj investimeve të huaja, Bytyqi theksoi se asgjë nuk është bërë e ditur në opinion para se të ishte e sigurt dhe institucionalisht e përfunduar.

“Ka shumë spekulime rreth Alcazar Energy, nëse kompania shtetërore kineze e energjisë qëndron pas saj, nëse është dikush tjetër, nuk mund ta dimë. Kur thua se duhet ta bëjmë vendin nga importues në eksportues dhe ky investim do të sjellë 100 milionë euro në PBB, çfarë do të thotë kjo për qytetarin, a do t’u hiqet gjithë energjia qytetarëve, era, burimet natyrore, të eksportohen diku? A nuk është kontradiktore me atë që ne po përpiqemi, që është të kënaqim konsumin e qytetarëve me prodhimin vendas”, tha Bytyqi dhe theksoi se nuk mund të njihet se si mbrohet interesi publik.

Deputeti Bytyqi theksoi se bëhet fjalë për dallim esencial në qasjen ndaj investimeve të huaja, kur Qeveria e LSDM-së ka negociuar me investitorët strategjikë, gjithmonë është munduar të garantojë mbrojtjen e interesit publik, gjë që tani nuk po ndodh. FLAKA

The post Bytyqi: Qytetarët nuk marrin asgjë nga promovimi i investimit me parkun e erës appeared first on Flaka, në çdo lajm... .