Draft-rregullorja e Prishtinës për tarifa biznesore: Çmimet do të rriten për qytetarët
Draft-rregullorja e Prishtinës për tarifa biznesore: Çmimet do të rriten për qytetarët
Lulzim Rafuna, kryetari i Odës Ekonomike të Kosovës (OEK), ka shprehur shqetësimin e komunitetit të biznesit lidhur me draft-rregulloren e Komunës së Prishtinës për ndryshimin e tarifave, ngarkesave dhe gjobave komunale. Sipas tij, çdo taksë e re për bizneset përkthehet në kosto shtesë që në fund bartet te konsumatori, duke rritur çmimet e produkteve dhe shërbimeve.
Në një intervistë për Ekonomia Online, Rafuna ka theksuar se OEK-ja nuk ka zhvilluar ende diskutime me Komunën e Prishtinës për përmbajtjen e draft-rregullores. Ai ka shtuar se është shumë herët për të dhënë një vlerësim të plotë për efektet që mund të ketë te bizneset, duke theksuar se konsultimi publik është ende në fazën e hapur.
“Nuk kemi pasur një bashkëbisedim me komunën sa i përket draft-rregullores. Është draft-rregullore, presim që në një moment të caktuar të kemi një takim dhe t’i shohim se cilat do të jenë efektet e kësaj rregulloreje te bizneset, në qoftë se hyn në fuqi. Ne gjithmonë kërkojmë që bizneset të mos jenë të ngarkuara, se çdo taksë për bizneset, në fund, është kosto operative që i bartet qytetarit”, ka thënë ai.
Sipas Rafunës, sektorët më të prekshëm janë transporti dhe ndërtimtaria, për shkak të operimit të tyre në territorin e Prishtinës me mjete dhe makineri të regjistruara në komuna të tjera. Ai ka theksuar nevojën për sqarime shtesë nga komuna për mënyrën e zbatimit të masave të propozuara, duke kërkuar që draft-rregullorja të qartësohet para miratimit të saj.
“Për neve është e paqartë, për shkak se sipas paraqitjeve publike, aq sa kemi pas mundësi me pa, taksa thuhet që do të vendoset vetëm për vetura, por jo edhe për makineri ose mjete të punës. Për këtë arsye jam ndoshta i paqartë. E dyta, në qoftë se vendoset ndonjë taksë, ajo është kosto ekstra për biznesin dhe padyshim i bartet konsumatorit, duke rritur çmimin”, ka shtuar ai.
Draft-rregullorja e Komunës së Prishtinës parasheh ndryshime të mëdha në mënyrën e taksimit të bizneseve, duke përcaktuar tarifa vjetore sipas llojit të veprimtarisë ekonomike. Dokumenti përfshin kategori të ndryshme biznesesh, duke përfshirë ndërtimin, tregtinë, hotelerinë, shëndetësinë private, arsimin privat, bankat, telekomunikacionin dhe shërbimet profesionale.
Ndër ndryshimet kryesore janë: lirimi nga pagesa e taksës komunale për bizneset e reja gjatë vitit të parë të regjistrimit, ulje prej 50% për bizneset në pronësi të grave dhe vajzave gjatë dy viteve të para, si dhe pagesa e tarifave komunale edhe për njësitë e bizneseve me seli jashtë Prishtinës, por me veprimtari në territorin e kryeqytetit.
Draft-rregullorja përfshin edhe vendosjen e taksës së akomodimit prej 1 euro për person për çdo natë qëndrimi në objektet akomoduese, si dhe obligimin e operatorëve që ta mbledhin, raportojnë dhe transferojnë këtë taksë në komunë. Dokumenti përmban gjithashtu dispozita për procedurat e faturimit, pagesës, ankesave dhe mbledhjes së detyrimeve komunale.
Konsultimi publik për draft-rregulloren ka filluar më 13 maj 2026 dhe do të zgjasë deri më 24 qershor 2026. Pas këtij procesi, Komuna e Prishtinës do të finalizojë dokumentin për miratim.
Me pak fjalë
Draft-rregullorja e Komunës së Prishtinës për ndryshimin e tarifave biznesore ka nxitur shqetësime te Lulzim Rafuna dhe OEK-ja. Sipas tyre, çdo taksë e re për bizneset do të rrisë çmimet për konsumatorët. Dokumenti përfshin ndryshime të mëdha në taksimin e bizneseve, duke përfshirë edhe taksën e akomodimit. Konsultimi publik është në vazhdim deri më 24 qershor 2026.
Personat e përmendur
Burimi i lajmit: orainfo.net
Shënim: Ky material është përpunuar për qëllime informimi nga Portali Kosova.Today.
