Gjermania pretendon se ka tejkaluar SHBA si mbështetësja më e madhe e Ukrainës

Gjermania është bërë furnizuesi më i madh i ndihmës ushtarake të Ukrainës dhe tani po dërgon më shumë armë se Shtetet e Bashkuara. Kështu, siç raportojnë mediat e huaja, përcjell Telegrafi, tha të mërkurën ministri i Mbrojtjes, Boris Pistorius.

Gjermania është “tani mbështetësja më e madhe” e Ukrainës, tha Pistorius në parlament, duke vënë në dukje se një total prej rreth 9 miliardë eurosh (10.5 miliardë dollarë) janë ndarë për këtë qëllim në buxhet.

Pas fillimit të agresionit të plotë rus të Ukrainës në shkurt 2022, aleatët evropianë kanë furnizuar sasi të mëdha ndihme ushtarake, por Shtetet e Bashkuara ishin padyshim mbështetësi më i madh.

Por Uashingtoni ka ndryshuar në mënyrë dramatike kursin që kur Donald Trump u kthye në Shtëpinë e Bardhë në janar, duke u zotuar të vërë “Amerikën të Parën”.

Ai madje pezulloi përkohësisht dërgesat ushtarake dhe ndarjen e “inteligjencës” për Kievin pas një përplasje publike të paparë me presidentin ukrainas Volodymyr Zelensky në Zyrën Ovale.

Pistorius vuri në dukje se SHBA-të kanë filluar furnizimin e Ukrainës me armë përmes iniciativës së Listës së Kërkesave të Prioriteteve të Ukrainës (PURL) të koordinuar nga NATO. Ndërsa këto armë sigurohen nga SHBA-të, ato financohen nga aleatë të tjerë. Ministri gjerman theksoi se sfida më e madhe në mbështetjen e Ukrainës në mbrojtjen e saj kundër sulmeve ruse ishte forcimi i mbrojtjes ajrore të vendit dhe industrisë së saj, “si dhe sigurimi që të gjithë të jenë dakord kur bëhet fjalë për mbështetjen e Ukrainës”.