Gjermania rikthen afatin dhjetëvjeçar për ruajtjen e faturave në luftë kundër mashtrimit tatimor

Qeveria gjermane po përgatitet të ashpërsojë sërish rregullat për ruajtjen e dokumentacionit financiar, në një përpjekje të re për të luftuar mashtrimin tatimor dhe krimin financiar. Ministri i Financave, Lars Klingbeil, ka propozuar zgjatjen e periudhës së detyrueshme për ruajtjen e faturave nga tetë në dhjetë vjet, duke e rikthyer afatin në nivelin e mëparshëm përpara reformës së vitit 2021, shkruan The Local, transmeton albinfo.ch.

“Kjo do të lejojë që hetimet tatimore të zgjasin më shumë dhe të jenë më të thella,” deklaroi Klingbeil, duke theksuar se zgjatja e afatit do të jetë një mjet i fuqishëm në luftën kundër evazionit fiskal, pastrimit të parave dhe punës së padeklaruar.

Kjo lëvizje vjen si një kthesë nga politika e mëparshme e shkurtimit të burokracisë, e cila nën drejtimin e ish-ministrit të financave Christian Lindner reduktoi kohën e ruajtjes së faturave në vetëm tetë vjet. Reforma atëherë u përshëndet nga sektori i biznesit si një lehtësim i ndjeshëm administrativ, por kritikët paralajmëronin se kjo mund të vështirësonte ndjekjen penale të mashtrimeve komplekse tatimore.

Ministria e Financave njoftoi gjithashtu planet për të forcuar mjetet hetimore, përfshirë përdorimin e analizës së automatizuar të të dhënave, që synon të identifikojë në mënyrë efikase modelet e dyshimta të sjelljes financiare.

Një nga objektivat e kësaj pakete është edhe luftimi i skemave të njohura si “cum-cum”, ku investitorë të huaj pretendojnë në mënyrë të rreme rimbursime të tatimit mbi fitimet kapitale, duke i shkaktuar buxhetit gjerman humbje të mëdha përmes manipulimeve të ndërlikuara financiare, transmeton albinfo.ch.

The post Gjermania rikthen afatin dhjetëvjeçar për ruajtjen e faturave në luftë kundër mashtrimit tatimor appeared first on Albinfo.