Gjermania zgjeron ushtrinë, ministri i Mbrojtjes: Na duhen 60 mijë trupa shtesë

Gjermanisë do t’i duhen deri në 60,000 trupa shtesë sipas objektivave të reja të NATO-s për armë dhe personel, tha Ministri i Mbrojtjes Boris Pistorius.

“Ne po i përgjigjemi përgjegjësisë sonë si ekonomia më e madhe e Evropës”, u tha ministri gazetarëve përpara një takimi me homologët e tij të NATO-s në Bruksel.

Kërkesat e reja janë të përshtatura sipas planeve mbrojtëse të aleancës, mijëra faqe dokumentesh sekrete të hartuara për herë të parë që nga fundi i Luftës së Ftohtë, që detajojnë se si forcat aleate do t’i përgjigjeshin një sulmi rus ndaj NATO.

Duke i përkthyer këto plane në mjetet ushtarake të nevojshme, NATO gjeti mangësi të mëdha në fusha të ndryshme, duke filluar nga formacionet e mëdha të trupave tokësore të gatshme për luftë deri te armët me rreze të gjatë veprimi, rezervat e mjaftueshme të municioneve dhe komunikimet e sigurta.

Në total, forcat e armatosura të Gjermanisë, do të kenë nevojë për afërsisht 50,000 deri në 60,000 ushtarë aktivë shtesë në të gjitha degët e ushtrisë, sipas Pistorius, gjë që do ta çonte forcën e ardhshme të forcave gjermane midis 250,000 dhe 260,000 trupa.

Më herët u raportua se NATO do t’i kërkojë Gjermanisë të ofrojë shtatë brigada të tjera ushtarake, ose rreth 40,000 trupa.

Rekrutimi i dhjetëra mijëra trupave shtesë do të jetë një sfidë e madhe për Berlinin, megjithatë, dhe ka të ngjarë të shkaktojë një debat të ri nëse rekrutimi ushtarak, i pezulluar në vitin 2011, duhet të rikthehet.

Ushtria gjermane ende nuk e ka arritur objektivin prej 203,000 trupash të vendosur në vitin 2018, dhe aktualisht ka mungesë stafi prej rreth 20,000 trupash të rregullta, sipas të dhënave të ministrisë së mbrojtjes.

Pistorius tha se qeveria do të përballet me pyetjen nëse shërbimi ushtarak vullnetar që synon të prezantojë do të jetë i mjaftueshëm për të mbushur radhët e ushtrisë.