Itali: Zbardhen detaje tronditëse të nënës 25 vjeçare që vrau dy foshnjat e saj dhe i fshehu trupat në dollap

Një krim i rëndë ka tronditur Italinë jugore. Një grua 25-vjeçare është arrestuar në zonën e Reggio Calabria-s, pasi akuzohet se ka mbytur dy fëmijët e saj binjakë menjëherë pas lindjes. Ngjarja ka ndodhur në korrik të vitit 2024, ndërsa hetimet janë përmbyllur vetëm sot.

Sipas hetimeve të prokurorisë, gruaja fillimisht ka mbytur foshnjat dhe më pas ka fshehur trupat e tyre në dollapin e dhomës së saj, të mbështjellë me një batanije. Krimi makabër u zbulua nga nëna e saj, e cila kishte ndier një erë të fortë që vinte nga dhoma.

Hetuesit dyshojnë se në ngjarje është përfshirë edhe i fejuari i saj, që është babai i binjakëve. Kjo pistë është forcuar nga komunikimet telefonike mes çiftit, ku flitej për mënyrën se si do të fshiheshin fëmijët. Për pasojë, edhe ai është vënë nën akuzë për bashkëpunim në vrasje.

Gjatë hetimeve ka dalë në dritë edhe një element tjetër tronditës: dyshohet se çifti ka vrarë edhe një foshnjë të tretë në vitin 2022 dhe e ka varrosur në një tokë që i përkiste familjes së vajzës. Policia dhe karabinierët po zhvillojnë kërkime për gjetjen e trupit.

E reja ishte paraqitur në spital me hemorragji të rëndë pak para se nëna e saj të gjente trupat e binjakëve në shtëpi. Gjatë gjithë kësaj kohe, ajo kishte mohuar të ishte shtatzënë apo të kishte lindur.

Hetimet vazhdojnë për të zbardhur plotësisht rrethanat e këtij rasti të rëndë, i cili ka shkaktuar tronditje të thellë në opinionin publik italian.

The post Itali: Zbardhen detaje tronditëse të nënës 25 vjeçare që vrau dy foshnjat e saj dhe i fshehu trupat në dollap appeared first on Albinfo.