Milan bën gati shitjen e parë të madhe, ylli i rosonerëve drejt Premier Ligës

Milan dhe Fulham kanë nisur bisedimet për një transferim të përhershëm të Samuel Chukwueze, sipas raportimeve të fundit nga gazetari Matteo Moretto. Pala angleze, e cila ka shfaqur interes që prej janarit, po bën tani hapa konkretë drejt afrimit të anësorit nigerian.

Chukwueze iu bashkua Milanit verën e kaluar nga Villarreal, por qëndrimi i tij në “San Siro” nuk ka qenë aq i suksesshëm sa pritej. Me vetëm 8 gola dhe 6 asiste në 70 paraqitje në të gjitha garat, 25-vjeçari nuk ka arritur të fitojë një vend të sigurt në formacionin titular, përcjell ORAinfo.

Rossonerët janë të gatshëm ta shesin, por jo ta huazojnë, ndërsa Fulham duket se e ka pranuar këtë kusht. Palët janë aktualisht në diskutime për një marrëveshje të drejtpërdrejtë, me Milanin që pritet të kërkojë një shumë rreth 25-30 milionë euro për kartonin e lojtarit.

Ky zhvillim vjen vetëm pak ditë para ndeshjes së Milanit ndaj Lecce, ku Chukwueze është një nga të paktët opsione sulmuese në stol, gjë që mund të ndikojë në kohën kur mbyllet marrëveshja.

Mbetet për t’u parë nëse Fulham do të konkretizojë ofertën dhe do të mbyllë marrëveshjen para fundit të afatit kalimtar, por sinjalet e para janë pozitive. /ORAinfo/