“Milani i ri ‘shpërthen’ me Allegrin – Zbulohen sekretet në dhomën e zhveshjes!

Mesfushori i Milanit, Youssouf Fofana, ka folur së fundmi për mediat italiane, ku ka ndarë përshtypjet e tij për trajnerin Massimiliano Allegri, ardhjet e reja në mesfushë dhe objektivat e sezonit të ri.

Fofana, i cili humbi ndeshjen e parë miqësore për shkak të një dëmtimi të lehtë në gju, pritet të rikthehet në fushë nesër në sfidën kundër Liverpoolit. Në prag të kësaj ndeshjeje, ai ka dhënë një intervistë për Gazzetta dello Sport, ku u shpreh optimist për sezonin që po afron.

“Jam rikuperuar dhe gati për të ndihmuar ekipin. Jemi të motivuar dhe mezi presim të nisë sezoni i ri. Ajo që kaloi, kaloi – tani mendojmë vetëm për të ardhmen,” tha Fofana, transmeton ORAinfo.

Vlerësime për Allegrin: “Bën diferencën”

Mesfushori francez u ndal edhe te ndikimi i trajnerit Allegri, duke e vlerësuar si një figurë kyçe për zhvillimin e ekipit:

“Ka një marrëdhënie shumë të mirë me grupin. Nuk flasim vetëm për futbollin, por edhe për aspekte të tjera që na ndihmojnë si skuadër. Në fushë, ai bën diferencën. Ne kishim nevojë për një trajner si ai, me përvojë dhe trofe të mëdhenj,” deklaroi ai.

Modric, një lider brenda dhe jashtë fushe

Një tjetër pikë që Fofana theksoi ishte prania e Luka Modric në skuadër:

“Jemi të gatshëm të sakrifikojmë për një lojtar si Modric. Ka shumë për të mësuar nga ai, vetëm duke e parë të luajë ose duke biseduar me të. Do të sjellë shumë vlerë te Milani,” tha mesfushori kuqezi.

Objektivi: Champions League dhe më shumë

Fofana e sheh pjesëmarrjen në Champions League si detyrim për Milanin:

“Milani duhet të jetë çdo sezon në Ligën e Kampionëve. Është pjesë e historisë dhe prestigjit të klubit. Qëllimi ynë është i qartë: të fitojmë çdo ndeshje dhe të kthehemi në elitën e futbollit evropian,” përfundoi ai.

Milani do të përballet me Liverpoolin në ndeshjen e radhës miqësore, dhe rikthimi i Fofanas dhe portierit Mike Maignan pritet të jetë një përforcim i rëndësishëm për kuqezinjtë në përgatitjet para sezonit. /ORAinfo/