Nicolas Sarkozy dënohet me 5 vite burg/ Shpallet fajtor për komplot kriminal në aferën me financimin nga Libia

Ish-presidenti i Francës, Nicolas Sarkozy, është dënuar me pesë vite burg nga një gjykatë penale në Paris, pasi u shpall fajtor për komplot kriminal, në një çështje që lidhet me miliona euro financime të paligjshme nga ish-udhëheqësi libian Muammar Gaddafi për fushatën e tij presidenciale të vitit 2007.

Sipas gjykatës, Sarkozy lejoi që bashkëpunëtorët e tij të afërt të vepronin me qëllim për të siguruar mbështetje financiare të paligjshme nga Libia, në një skemë që përfshinte miliona euro.

Ndër të dënuarit e tjerë janë: Claude Guéant, ish-menaxheri i fushatës së Sarkozy, shpallur fajtor për konspiracion kriminal, korrupsion, falsifikim dhe pastrim parash të rënduar.

Brice Hortefeux, ish-ministër i Brendshëm, gjithashtu fajtor për komplot kriminal dhe financim të paligjshëm të fushatës.

Sarkozy, 70 vjeç, pritet të qëndrojë i lirë në pritje të vendimit përfundimtar, pasi ka të drejtë ta apelojë vendimin, duke shtyrë çdo dënim të mundshëm.

Ai ka mohuar vazhdimisht akuzat, duke i cilësuar si një “fushatë shpifjeje” e orkestruar nga aleatët e Gaddafit, në hakmarrje për rolin e tij udhëheqës në ndërhyrjen e NATO-s që çoi në rrëzimin e diktatorit libian në vitin 2011.

Ky nuk është procesi i vetëm penal ndaj Sarkozy. Ai është dënuar më parë për:

Korrupsion dhe ushtrim të ndikimit të paligjshëm dhe financim të paligjshëm të fushatës në çështjen e njohur si “afera Bygmalion”

Këto dënime i kanë kushtuar revokimin e dekoratës së Legjionit të Nderit, ndërsa çështja libiane përbën rastin më të rëndë ligjor me të cilin është përballur ish-presidenti.

Pavarësisht përplasjeve të shumta me drejtësinë, Nicolas Sarkozy mbetet një figurë me ndikim në të djathtën franceze, me lidhje të rregullta me presidentin aktual Emmanuel Macron dhe një prani të vazhdueshme në prapaskenat politike franceze.  / abcnews.al /