Policia jep detaje për aksidentin në Drenas ku humbi jetën një e mitur

Një aksident i rëndë trafiku ku një e mitur ka humbur jetën ka ndodhur pasditen e së dielës në Drenas.

Policia e Kosovës përmes raportit 24 orësh ka dhënë detaje, duke theksuar se aksidenti ka ndodhur rreth orës 17:08.

Në aksident është përfshirë një veturë me targa vendore, e cila dyshohet se ka dalë nga rruga dhe është vetaksidentuar.

Sipas raportit zyrtar të Policisë, një femër kosovare ka humbur jetën si pasojë e plagëve të marra në aksident.

Po ashtu pesë persona të tjerë janë lënduar përfshirë tre femra, një mashkull dhe vetë drejtuesen e veturës.

“Një veturë me targa vendore, e drejtuar nga e dyshuara femër kosovare, dyshohet se ka dalë nga rruga dhe është vet-aksidentuar. Si pasojë, një viktimë femër ka ndërruar jetë, ndërsa pesë persona tjerë kanë pësuar lëndime trupore,” thuhet në njoftimin e Policisë.

Të lënduarit janë dërguar për trajtim mjekësor në Qendrën Klinike Universitare të Kosovës (QKUK) në Prishtinë.

Me urdhër të prokurorit të shtetit, trupi i pajetë është dërguar në Institutin e Mjekësisë Ligjore (IML) për obduksion.

Ndërkaq mbrëmë policia bëri të ditur se viktima e këtij aksidenti është një e mitur.

Policia po vazhdon hetimet për të sqaruar rrethanat dhe shkakun e këtij aksidenti tragjik.