Presidentja: Britania pranon propozimin për bashkëpunim strategjik në fushën e mbrojtjes dhe ekonomisë

Presidentja e vendit, Vjosa Osmani ka bërë të ditur se Sekretarit të Jashtëm të Britanisë së Madhe, David Lammyt, i ka propozuar lidhjen e marrëveshjes për thellim strategjik të bashkëpunimit ndërmjet të dyja vendeve në fushën e mbrojtjes dhe ekonomisë.

Ajo e vlerësoi faktin që ky propozim është mirëpritur nga Lammy dhe tha se ky hap do të kontribuojë jo vetëm në forcimin e sigurisë së Kosovës, por edhe në avancimin e industrisë së Mbrojtjes së Britanisë së Madhe.

“Sot diskutuam për thellimin e bashkëpunimit tonë strategjik në fusha kyçe, përfshirë mbrojtjen dhe ekonominë. Siç diskutuam gjatë takimit, e vlerësoj shumë faktin që e keni mirëpritur propozimin tim për një thellim dhe zgjerim të partneritetit në këto dy fusha, si dhe atë të ekonomisë. Jemi të përkushtuar të vazhdojmë bashkëpunimin në mes të ekipeve dhe institucioneve tona për ta konkretizuar këtë partneritet dhe për t’i dhënë formën e duhur. Konsideroj se ka hapësirë të jashtëzakonshme për fuqizim të mëtutjeshëm të aleancës sonë dhe prezencë akoma më aktive të Mbretërisë së Bashkuar në Kosovë dhe anasjelltas”, ka thënë Osmani në konferencën e përbashkët me Lammy

Osmani më tej bëri të ditur se me Lammyn ka diskutuar edhe për të ardhmen euroatlantike të Kosovës.

“Një aspiratë të vilën Britania e Madhe e ka mbështetur që nga fillimet e raporteve tona, siç ka qenë edhe mbështetja e fuqishme e Anglisë në Këshillin e Evropës”, u shpreh Osmani.