Nis viti i ri shkollor, Berisha ngre alarmin për rënien e numrit të nxënësve: Kemi humbur rreth 5900 brenda një viti

Kryetari i Partisë Demokratike, Sali Berisha, ka përcjellë një mesazh me rastin e fillimit të vitit të ri shkollor 2026–2027, veçanërisht për nxënësit që ulen për herë të parë në bankat e shkollës, duke iu uruar një vit të mbushur me dije, suksese dhe ëndrra të bukura.

Në urimin e tij për nxënësit, mësuesit dhe prindërit shqiptarë, Berisha u shpreh se ky vit shkollor e gjen Shqipërinë përballë një “alarm të madh demografik dhe arsimor”.

Berisha thekson se, vetëm brenda një viti numri i nxënësve të arsimit fillor ka rënë nga 146,962 në 141,089, duke humbur rreth 5,900 nxënës, ose rreth 4%. Ai e krahasoi këtë shifër me Bashkimin Europian, ku rënia ka qenë vetëm 0.2%.

Sipas liderit demokrat, kjo situatë është pasojë e politikave që, në vend që të ndalojnë shpopullimin, emigracionin dhe tkurrjen e familjeve shqiptare, i kanë thelluar ato.

Reagimi i plotë:

Të dashur nxënës, mësues dhe prindër,

Së pari, urimin më të përzemërt për të gjithë nxënësit, mësuesit dhe prindërit shqiptarë në këtë ditë të veçantë për ta dhe për mbarë kombin.

Një urim të veçantë, nga zemra, për vogëlushet dhe vogëlushët që ulen sot për herë të parë në bankat e shkollës. Uroj që ky vit i ri shkollor të jetë për ta një vit i mbarë dhe plot suksese, dije dhe ëndrra të bukura.

Por, të dashur miq, viti i ri shkollor 2026–2027 e gjen Shqipërinë përballë një alarmi të madh demografik dhe arsimor.

Në vetëm një vit, Shqipëria ka humbur rreth 5,900 nxënës të arsimit fillor. Numri i tyre ka rënë nga 146,962 në 141,089, një tkurrje prej rreth 4 %, ndërkohë, në Bashkimin Europian rënia ishte vetëm 0.2%. Pra, Shqipëria po humbet fëmijët e saj me një ritëm shumë më të shpejtë se Europa.

Ky është rezultati i një politike që nuk ka arritur të ndalë shpopullimin, emigracionin dhe largimin e familjeve shqiptare. Shqipëria po zbrazet, por narkoqeveria që është dhe shkaku i zbrazjes është vetëm e kënaqur me këtë!https://www.facebook.com/SaliBerisha/posts/1874619927352434?ref=embed_post

Burimi i lajmit: ina-online.net
Shënim: Ky material është përpunuar për qëllime informimi nga Portali Kosova.Today.