Shoqatat e fermerëve në Cyrih dhe Schaffhausen krijojnë bursë foragjeresh për shkak të thatësirës

Shoqatat e fermerëve të kantoneve Cyrih dhe Schaffhausen kanë krijuar një platformë online për shkëmbimin e foragjereve, si përgjigje ndaj thatësirës së vazhdueshme që po prek bujqësinë zvicerane, përcjell albinfo.ch.

Sipas shoqatave, mungesa e reshjeve ka bërë që bari në shumë livadhe të thahet, duke detyruar fermerët të përdorin që tani rezervat e sanës që ishin planifikuar për muajt e dimrit. Nëse situata vazhdon, shumë prej tyre do të detyrohen të blejnë foragjere shtesë ose të zvogëlojnë numrin e bagëtive.

Për të lehtësuar situatën, është krijuar një bursë online ku fermerët mund të gjejnë njëri tjetrin dhe të shkëmbejnë ose shesin foragjere. Platforma synon të lidhë veçanërisht fermat me kultura bujqësore ose me pak bagëti me ato që kanë nevojë për ushqim shtesë për kafshët.

Shoqatat u bëjnë thirrje fermerëve që kultivojnë misër për kokërr ose kultura të tjera të përshtatshme, që nëse kushtet e motit e lejojnë, t’i ofrojnë ato si foragjere për fermat blegtorale. Sipas tyre, shumë fermerë janë të gatshëm të bashkëpunojnë, me kusht që të sigurohen paraprakisht blerësit dhe kushtet e furnizimit.

Thatësira ka përkeqësuar ndjeshëm gjendjen e sektorit bujqësor në Zvicër gjatë javëve të fundit, ndërsa parashikimet meteorologjike nuk sinjalizojnë reshje të konsiderueshme në ditët në vijim. Për këtë arsye, shoqatat e fermerëve e konsiderojnë bashkëpunimin ndërmjet fermave si një hap të rëndësishëm për të përballuar mungesën e foragjereve.

The post Shoqatat e fermerëve në Cyrih dhe Schaffhausen krijojnë bursë foragjeresh për shkak të thatësirës appeared first on Albinfo.

Burimi i lajmit: albinfo.ch
Shënim: Ky material është përpunuar për qëllime informimi nga Portali Kosova.Today.