Sulm në një shtëpi në Zvicër: Persona të maskuar kërcënojnë çiftin dhe grabisin sende me vlerë

Një çift bashkëshortor është përballur me një sulm të dhunshëm në shtëpinë e tyre në Coppet, në kantonin Vaud, pasi disa persona të maskuar hynë në banesë në orët e hershme të mëngjesit të së hënës. Sulmuesit i kërcënuan banorët dhe kërkuan sende me vlerë, përpara se të largoheshin me një plaçkë ende të papërcaktuar, përcjell albinfo.ch.

Sipas Policisë Kantonale të Vaud-it, ngjarja ndodhi rreth orës 5:00, ndërsa çifti ndodhej brenda shtëpisë. Gjatë sulmit, 69-vjeçari, shtetas italian, pësoi lëndime të lehta në kokë. Autoritetet ende nuk kanë sqaruar rrethanat e sakta se si u lëndua.

Bashkëshortja e tij, 67-vjeçare me shtetësi britanike, nuk pësoi lëndime fizike.

Pas grabitjes, personat e maskuar u larguan nga vendi i ngjarjes duke marrë me vete disa sende. Deri më tani nuk është bërë e ditur se çfarë konkretisht kanë marrë dhe sa është vlera e plaçkës.

Policia kantonale ka nisur menjëherë një operacion të gjerë kërkimi, ndërsa hetimet po vazhdojnë për identifikimin dhe arrestimin e autorëve. Deri në publikimin e informacionit, nuk janë dhënë të dhëna të tjera për identitetin apo numrin e saktë të personave të përfshirë./Albinfo.ch

The post Sulm në një shtëpi në Zvicër: Persona të maskuar kërcënojnë çiftin dhe grabisin sende me vlerë appeared first on Albinfo.

Burimi i lajmit: albinfo.ch
Shënim: Ky material është përpunuar për qëllime informimi nga Portali Kosova.Today.