Trump: Irani ka shprehur dëshirë për takim, po shqyrtohet mundësia

Presidenti amerikan Donald Trump deklaroi se Irani ka shprehur interes për një takim, ndërsa ai po shqyrton mundësinë e pranimit të kësaj kërkese. Komentet e Trump erdhën ndërsa ai po përgatitet për një mbledhje në Dhomën e Situatave të Shtëpisë së Bardhë, e fokusuar në përshkallëzimin e konfliktit midis Izraelit dhe Iranit.

Duke folur për gazetarët, Trump i cilësoi sulmet izraelite ndaj Iranit si “shkatërruese” dhe u shpreh i tronditur nga pasojat njerëzore të përplasjes: “Është një gjë e tmerrshme. Më dhemb kur shoh gjithë atë vdekje, aq shumë vdekje dhe shkatërrim.”

Sipas tij, Izraeli po zhvillon me sukses operacione që synojnë çmontimin e kapaciteteve bërthamore iraniane. Trump vlerësoi se Irani ishte vetëm disa javë larg përftimit të një arme bërthamore para nisjes së këtyre sulmeve.

Lidhur me hapat e ardhshëm, presidenti shtoi se ka “disa ide për çfarë të bëjë më tej”, por theksoi se preferon të marrë vendimin përfundimtar “vetëm një sekondë para se të jetë e nevojshme”.

Ai përfundoi duke nënvizuar se mbështetësit e tij nuk duan të shohin një Iran të armatosur me armë bërthamore./abcnews.al