Urdhri i Izraelit për evakuim shkakton panik në qytetin e Gazës

Ushtria izraelite të martën u urdhëroi banorëve të qytetit të Gazës të evakuohen përpara një ofensive të re, pasi Izraeli paralajmëroi se do të shtonte sulmet e saj ushtarake në Rrip në një “uragan të fuqishëm” nëse Hamasi nuk liron pengjet e fundit që mban.

Banorët e qytetit me një milion palestinezë kanë pritur një sulm të fuqishëm prej javësh, që kur qeveria izraelite hartoi një plan për t’i dhënë Hamasit një goditje fatale në ato që i quan fortesat e fundit të mbetura të grupit militant.

“U them banorëve të Gazës, shfrytëzojeni këtë mundësi dhe më dëgjoni me kujdes: ju jeni paralajmëruar – largohuni që andej!”, tha kryeministri izraelit Benjamin Netanyahu.

Urdhrat për evakuim shkaktuan panik dhe konfuzion midis banorëve të qendrës më të madhe urbane të Rripit. Disa thanë se nuk do të kishin zgjidhje tjetër veçse të largoheshin për në jug, por shumica thanë se do të qëndronin pasi asnjë vend tjetër nuk ishte i sigurt.

“Pavarësisht bombardimeve të javës së kaluar, kam rezistuar të largohem, por tani do të shkoj të jem me vajzën time”, tha Um Mohammad, një nënë 55-vjeçare me gjashtë fëmijë.

Banorët e Gazës janë zhvendosur disa herë që nga fillimi i luftës në tetor 2023, duke lëvizur midis veriut dhe jugut të enklavës bregdetare, në një krizë humanitare që po përkeqësohet dhe ka çuar në uri.