Vendoset pllaka përkujtimore në Gjermani në ndërtesën ku operonte Qeveria Bukoshi

Në nderim të 26-vjetorit të Çlirimit të Kosovës, në Gjermani është zbuluar një pllakë përkujtimore në ndërtesën ku dikur funksiononte Qeveria e Kosovës në ekzil.

Lajmin e ka bërë të ditur ambasadori i Kosovës në Gjermani, Faruk Ajeti, i cili tha se ky është një akt mirënjohjeje dhe respekti nga shteti gjerman për popullin dhe historinë e Kosovës.

“Zbulimi i kësaj pllake përkujtimore – sot më 12 qershor për Ditën e Çlirimit të Kosovës – nuk është vetëm një akt simbolik. Është një akt mirënjohjeje dhe respekti – fillimisht për historinë tonë, për njerëzit tanë, për institucionet tona të atëhershme që vepruan në kushte të jashtëzakonshme, si dhe për shtetin mik gjerman, i cili ishte i vetmi shtet që asokohe e lejoi funksionimin e Qeverisë në ekzil në territorin e tij”, ka shkruar Ajeti në Facebook.

Kjo qeveri drejtohej nga Bujar Bukoshi, i cili ndërroi jetë gjatë kësaj jave.

Kosova sot shënon 26 vjetorin e çlirimit, një datë që simbolizon fundin e luftës dhe hyrjen e trupave të NATO-s në vend.