Zelensky: Të gatshëm të ndajmë përvojat tona me NATO-n në përballimin e sulmeve me dronë rusë

Presidenti ukrainas, Volodymyr Zelensky ka theksuar rëndësinë e dronëve në mbrojtjen e vendit të tij kundër pushtimit rus dhe njëkohësisht i ka ofruar mbështetje NATO-s në përballimin e dronëve rusë.

“Sanksionet më efektive apo sanksionet që funksionojnë më shpejt janë zjarret në rafineritë ruse të naftës, në terminalet dhe depot e tyre të naftës”, tha ai në fjalimin e tij video të mbrëmjes të dielën, duke iu referuar një serie sulmesh me dronë ukrainas që synojnë sektorin rus të naftës.

Ai tha se këto sulme janë të dhimbshme për Rusinë dhe gjithashtu ndikojnë në përpjekjet luftarake të Moskës.

”Sulmet kanë kufizuar ndjeshëm industrinë ruse të naftës dhe kjo kufizon ndjeshëm luftën”, tha Zelensky.

Ukraina sulmoi kohët e fundit një nga rafineritë më të mëdha të Rusisë në qytetin Kirishi, 110 kilometra në juglindje të Shën Petërburgut. Para konfirmimit zyrtar të sulmit, imazhe dhe video që tregonin flakë të mëdha mbi rafineri tashmë qarkullonin në rrjetet sociale.

Zelensky tha se Ukraina është gati të ndajë përvojat e saj në përballimin e sulmeve me dronë rusë me NATO-n, duke iu referuar ndërhyrjes së fundit të dronëve rusë në hapësirën ajrore polake disa ditë më parë dhe incidentit të fundit me një dron rus mbi Rumani.

“Ne jemi gati të trajnojmë të gjithë partnerët në këtë lloj mbrojtjeje”, tha Zelensky.

Ndërsa NATO ka armë mbrojtëse efektive, ai tha se Ukraina ka zhvilluar “zgjidhje dukshëm më efektive nga ana e kostos”.