Zvicër: Kalkulator i ri për krahasimin e sigurimeve shëndetësore para rritjes së primeve në vitin 2027

RTSinfo, në bashkëpunim me Federatën Romande të Konsumatorëve (FRC), ka zhvilluar një kalkulator që u mundëson qytetarëve në Zvicër të krahasojnë çmimet dhe kushtet e sigurimeve shëndetësore, në prag të rritjes së pritshme të primeve për vitin 2027.

Mjeti synon t’i ndihmojë të siguruarit të gjejnë oferta që u përshtaten nevojave dhe mundësive të tyre financiare, duke marrë parasysh edhe kufizimet e mundshme të shërbimeve. Planet me prime më të ulëta mund të përfshijnë përdorimin e detyrueshëm të telemjekësisë, lista të kufizuara të mjekëve ose rrjete të paracaktuara të kujdesit shëndetësor.

Përmes këtij kalkulatori, qytetarët mund të shqyrtojnë jo vetëm kostot, por edhe kushtet që ndikojnë në lirinë e tyre për të zgjedhur mjekun e familjes dhe specialistët.

Ndërkohë, RTS ka hapur edhe një platformë ku qytetarët mund të propozojnë mënyra për të frenuar rritjen e primeve të sigurimeve shëndetësore. Deri më 29 shtator, ishin regjistruar 84 propozime.

Një nga idetë e paraqitura është krijimi i një fondi të sigurimeve shëndetësore të menaxhuar nga shteti dhe i financuar nga kontributet e të siguruarve. Sipas propozuesit, një model i tillë mund të ulë kostot, pasi nuk do të kishte nevojë të realizonte fitime apo të paguante dividendë.

The post Zvicër: Kalkulator i ri për krahasimin e sigurimeve shëndetësore para rritjes së primeve në vitin 2027 appeared first on Albinfo.

Burimi i lajmit: albinfo.ch
Shënim: Ky material është përpunuar për qëllime informimi nga Portali Kosova.Today.