Zvicra nuk kultivon kafe, por si ndryshoi botën dhe mënyrën e konsumimit të saj

Zvicra, edhe pse nuk prodhon asnjë kokërr kafeje, ka qenë vendi që ka revolucionarizuar mënyrën se si përgatitet dhe konsumohet kjo pije në mbarë botën. Inovacionet “Made in Switzerland” kanë ndikuar direkt në zakonet e përditshme të miliona njerëzve, nga shpikja e kafesë së tretshme deri te kapsulat që përdoren sot në çdo zyrë apo shtëpi, transmeton albinfo.ch.

Kafeja e tretshme: Si nisi historia me Nestlé

Pas krizës së madhe ekonomike në vitin 1929, Brazili kishte rezerva të mëdha me kafe të papërdorur. Instituti Brazilian i Kafesë kërkoi ndihmën e gjigandit zviceran Nestlé për të gjetur një mënyrë që kjo kafe të shfrytëzohej.

Shpikja erdhi nga kimisti zviceran Max Morgenthaler, i cili arriti të krijojë një formulë që ruante shijen dhe aromën e kafesë, duke përdorur karbohidrate për ta mbrojtur gjatë tharjes. Rezultati ishte Nescafé, kafeja e parë e tretshme cilësore, që u lançua në vitin 1938 dhe u bë menjëherë hit global.

Makina e parë automatike për espresso në shtëpi

Espresso deri në vitet ’70 ishte një luks që konsumohej vetëm në kafene. Por kjo ndryshoi kur inxhinieri zviceran Arthur Schmed, së bashku me kolegun italian Sergio Zappella, krijuan makinerinë e parë automatike për përgatitjen e kafesë në kushte shtëpie.

Kompania që qëndroi pas zhvillimit të saj ishte Solis, dhe më vonë, në vitin 1985, u themelua kompania Saeco, që solli në tregin ndërkombëtar makinat e para të espresos për përdorim personal.

Kapsulat e kafesë: Një shpikje zvicerane që pushtoi botën

Në vitin 1975, inxhinieri zviceran i aerodinamikës Eric Favre, punonjës në Nestlé, krijoi një sistem inovativ për përgatitjen e kafesë me kapsula. I frymëzuar nga mënyra e përgatitjes së kafesë në një kafene të famshme në Romë, ai krijoi një kapsulë që bënte të mundur përgatitjen e një espressoje perfekte në pak sekonda.

Edhe pse fillimisht kompania nuk i dha rëndësi projektit të tij, më vonë, në vitin 1986, lindi Nespresso – marka që do të ndryshonte përgjithmonë mënyrën se si konsumohet kafeja në zyrë dhe në shtëpi.

The post Zvicra nuk kultivon kafe, por si ndryshoi botën dhe mënyrën e konsumimit të saj appeared first on Albinfo.