VLEN akuzon BDI-n për heshtje pas dokumentit për serbishten në Kumanovë
VLEN kërkon përgjigje nga BDI për dokumentin e vitit 2010
Koalicioni VLEN ka akuzuar sot BDI-në për shmangie të përgjegjësisë politike dhe heshtje të vazhdueshme përballë një dokumenti që, sipas tyre, dëshmon se kjo parti ka votuar në vitin 2010 për futjen e gjuhës serbe në përdorim zyrtar në Komunën e Kumanovës.
Në një konferencë për median e mbajtur sot, Afan Elezi, anëtar i koalicionit VLEN, ka deklaruar se janë kaluar 24 orë nga publikimi i dokumentit, ndërsa nga BDI ende nuk ka pasur asnjë reagim zyrtar.
“Deri më tani, BDI nuk ka dhënë asnjë përgjigje për këtë fakt. Nuk e mohoi dokumentin, nuk e mohoi vendimin dhe nuk e mohoi votën e saj. Zgjodhi heshtjen. Dhe në politikë, heshtja është pranimi më i mirë i së vërtetës”, ka thënë Afan Elezi.
Sipas tij, BDI shmang debatin publik dhe përpiqet të zhvendosë vëmendjen në tema të tjera çdo herë që përballet me fakte dhe dokumente.
“Kur faktet janë kundër tyre, BDI ikën nga debati. Kur dokumentet flasin, ata ndërrojnë temë. Kur shqiptarët kërkojnë përgjigje, ata përsëri ndërrojnë temën”, ka shtuar Elezi.
VLEN ka drejtuar sërish pyetje publike BDI-së lidhur me arsyet e mbështetjes së zyrtarizimit të gjuhës serbe në Kumanovë.
“Pse BDI e mbështeti zyrtarizimin e gjuhës serbe në Kumanovë? Pse për këtë çështje kishte zell, votë dhe vullnet politik, ndërsa për problemet e shqiptarëve kishte vonesa, pengesa dhe çështje të lëna përgjysmë?”, ka pyetur Elezi.
Ai ka theksuar se qytetarët meritojnë përgjigje të qarta dhe jo, siç u shpreh, “deklarata boshe dhe patriotizëm sezonal”.
“BDI hesht, sepse dokumenti flet. Dhe kur dokumenti flet, propaganda nuk pi më ujë. VLEN nuk merret me propagandë. VLEN flet me fakte. Dhe fakti është ky: dokumenti ekziston, ndërsa BDI ende nuk ka guxim të përballet me të”, ka përfunduar Afan Elezi.
Me pak fjalë
Koalicioni VLEN ka akuzuar BDI-n për heshtje pas publikimit të një dokumenti që dëshmon se kjo parti ka votuar në vitin 2010 për futjen e gjuhës serbe në përdorim zyrtar në Komunën e Kumanovës. Afan Elezi ka kërkuar përgjigje të qarta nga BDI dhe ka deklaruar se heshtja e partisë është pranimi i së vërtetës.
Personat e përmendur
Burimi i lajmit: infoshqip.com
Shënim: Ky material është përpunuar për qëllime informimi nga Portali Kosova.Today.
