Bazel: Më 18 maj votohet se si do shpenzohen milionat e siguruara nga taksat
Më 18 maj, qytetarët e kantonit Bazel-Stadt do të vendosin në një referendum për një paketë të re financimi që synon të ruajë atraktivitetin e kantonit si vendndodhje për korporatat ndërkombëtare, përballë ndikimeve të reformës globale të taksimit të iniciuar nga OECD-ja, shkruan SRF, transmeton albinfo.ch. Paketa e propozuar nga qeveria kantonale parashikon krijimin e […] The post Bazel: Më 18 maj votohet se si do shpenzohen milionat e siguruara nga taksat appeared first on Albinfo.

Më 18 maj, qytetarët e kantonit Bazel-Stadt do të vendosin në një referendum për një paketë të re financimi që synon të ruajë atraktivitetin e kantonit si vendndodhje për korporatat ndërkombëtare, përballë ndikimeve të reformës globale të taksimit të iniciuar nga OECD-ja, shkruan SRF, transmeton albinfo.ch.
Paketa e propozuar nga qeveria kantonale parashikon krijimin e dy fondeve të veçanta që do të financohen nga të ardhurat shtesë të pritshme — të vlerësuara ndërmjet 270 dhe 310 milionë frangash zvicerane në vit — që do të mblidhen përmes një takse plotësuese ndaj fitimeve të korporatave të mëdha, për të përmbushur standardin e ri minimal prej 15% të taksimit të vendosur nga OECD-ja.
Sipas planit, deri në 500 milionë franga do të ndahen çdo vit në dy fonde: 80% e shumës do të shkojë për Fondin e Inovacionit, i cili synon të mbështesë kërkimin, zhvillimin dhe funksione të tjera menaxheriale në kompani. Pjesa e mbetur, 20%, do të përdoret për projekte sociale dhe mjedisore, përfshirë përkrahjen e lejes prindërore.
Qeveria e Bazelit, mbështetur nga shumica parlamentare, argumenton se ky është një hap i domosdoshëm për të mbrojtur konkurrueshmërinë ndërkombëtare të kantonit. “Kompromisi që kemi arritur është në të mirë të biznesit dhe shoqërisë”, thuhet në deklaratën e Partisë Socialdemokrate (SP), e cila mbështet paketën së bashku me FDP, GLP dhe partitë konservatore, transmeton albinfo.ch.
Megjithatë, jo të gjithë janë të bindur. Një komitet nga qarqet e majta ka iniciuar referendumin, duke akuzuar qeverinë se po kthen paratë e taksapaguesve në duart e korporatave. Socialistët e Rinj (Juso) kanë kritikuar hapur vendimin e partisë së tyre mëmë (SP) për të mbështetur këtë paketë, duke e quajtur atë “rishpërndarje të zbardhur për bizneset e mëdha”.
Partia e majtë radikale Basta ka shkuar edhe më tej, duke e përshkruar planin si një “dyqan vetëshërbimi për korporatat shumëkombëshe”. Sipas tyre, paketa i nënshtrohet logjikës së konkurrencës globale të subvencioneve, që zëvendëson konkurrencën tatimore dhe minon vetë parimin e taksës minimale të OECD-së, transmeton albinfo.ch.
The post Bazel: Më 18 maj votohet se si do shpenzohen milionat e siguruara nga taksat appeared first on Albinfo.