“Fqinjët të pranojnë palestinezë nga Gaza”/ Kundërshti për planin e Trump: Do të ishte spastrim etnik

Propozimi i Donald Trump për të dërguar një numër të madh palestinezësh nga Gaza në vendet fqinje si Egjipti dhe Jordania është hedhur poshtë nga aktivistët dhe grupet e të drejtave të njeriut, duke e cilësuar si të rrezikshëm, të paligjshëm dhe të papërshtatshëm.

Presidenti amerikan tha se do të dëshironte që qindra mijëra njerëz të shpërngulen në vendet fqinje, ose “përkohësisht ose në plan afatgjatë”.

Popullsia e Gazës para luftës ishte 2.3 milionë banorë. Jordania dhe Egjipti e kanë bërë të qartë se nuk do të marrin refugjatë nga Gaza. Të dielën, ministri i Jashtëm jordanez, Ayman Safadi, shprehu vendosshmërinë e vendit të tij për të refuzuar këtë plan zhvendosjeje.

“Të ‘pastrohet’ Gaza menjëherë pas luftës do të ishte në fakt një vazhdim i luftës, nëpërmjet spastrimit etnik të popullit palestinez,” tha Hassan Jabareen, drejtori i grupit palestinez të të drejtave Adalah.

Omer Shatz, një lektor i së drejtës ndërkombëtare në Sciences Po Paris dhe këshilltar i Gjykatës Penale Ndërkombëtare (ICC), tha se komentet e Trump ishin një “thirrje për spastrim etnik” që i bënte jehonë thirrjeve të politikanëve ekstremistë izraelitë dhe figurave publike që datojnë nga fillimi i luftës.

“Ne jemi dëshmitarë të një vazhdimësie jashtëzakonisht të rrezikshme, por të natyrshme të thirrjeve dehumanizuese dhe gjenocidale që kemi parë nga zërat më ekstremë brenda Izraelit,” tha ai.

Grupi i të drejtave të avokimit civil të Këshillit për Marrëdhëniet Amerikano-Islamike (CAIR) tha se sugjerimi i Trump ishte “marrëzi dhe i rrezikshëm” në një deklaratë që e përshkruante gjithashtu si një propozim për spastrim etnik.

“Populli palestinez nuk është i gatshëm të braktisë Gazën dhe vendet fqinje nuk janë të gatshme të ndihmojnë Izraelin për spastrimin etnik të Gazës”, thuhet në deklaratë.

Komentet e Trump u mirëpritën nga politikanët izraelitë të ekstremit të djathtë. Ministri i Financave, Bezalel Smotrich, e përshkroi zhvendosjen e palestinezëve si një “ide të shkëlqyer” dhe tha se do të punonte me kryeministrin dhe kabinetin për të krijuar një “plan operacional për zbatim” sa më shpejt të jetë e mundur./abcnews.al