Fundjava pritet të jetë tropikale në disa rajone të Zvicrës

Në Zvicër po rriten temperaturat. Të shtunën, rajonet e Liqenit të Gjenevës, Valais dhe Bazelit pritet të shënojnë ditën e parë tropikale të vitit, me temperatura që kalojnë 30°C, sipas MeteoSwiss.

E premtja është gjithashtu shumë me diell, me temperatura të verës ndërmjet 26°C dhe 28°C pasdite. Të shtunën nxehtësia pritet të jetë edhe më intensive, pavarësisht një mbulesë të lehtë të reve në lartësitë më të larta, me merkurin që luhatet ndërmjet 28°C dhe 30°C.

Të dielën temperaturat do të vijojnë të jenë të buta në fillim të ditës, por ajri do të jetë pak më i paqëndrueshëm duke shtuar rrezikun për reshje shiu dhe bubullima. Në orët e pasdites kjo prirje pritet të jetë më e theksuar, me stuhi kryesisht në male, njofton Zyra Federale e Meteorologjisë dhe Klimatologjisë, transmeton albinfo.ch.

Reshjet pritet të vazhdojnë edhe mëngjesin e së hënës. Ndërkohë termometri do të bjerë rreth dhjetë gradë, ndërsa temperaturat do të lëvizin rreth 20°C deri në mesjavë.

The post Fundjava pritet të jetë tropikale në disa rajone të Zvicrës appeared first on Albinfo.