Gjermania dhe Polonia nënshkruajnë marrëveshje për ushtrinë

Kompania polake e mbrojtjes “Polska Grupa Zbrojeniowa” dhe prodhuesi gjerman i armëve “Rheinmetall” kanë nënshkruar një marrëveshje për furnizimin e forcave të armatosura polake.

Të dy firmat nënshkruan një memorandum mirëkuptimi (MoU) për bashkëpunim strategjik në fushën e automjeteve mbështetëse për ushtrinë polake.

Qëllimi i MoU-së është krijimi i një bashkëpunimi të përbashkët për të ngritur një Qendër Evropiane të Automjeteve Mbështetëse, të përqëndruar në prodhimin e automjeteve të blinduara për rikuperim dhe automjeteve inxhinierike të blinduara me kapacitet për çmontimin  e minave.

“MoU-ja simbolizon mirëkuptimin tonë të ndërsjelltë, objektivat e përbashkëta dhe dëshirën për të punuar ngushtë së bashku, për të shkëmbyer njohuri, për të shfrytëzuar fuqitë tona kolektive dhe për të eksploruar mundësi të reja”,  tha dr. Bjorn Bernhard, drejtor menaxhues i “Vehicle Systems Europe”.

Nënshkrimi i MoU-së jo vetëm që hap derën për zgjerimin e kapacitetit të prodhimit të automjeteve të rënda në Poloni, por kontribuon edhe në ndërtimin e një potenciali mbrojtës pan-evropian, krijimin e partneriteteve shumëkombëshe, rritjen e kapaciteteve rezervë, gjë e rëndësishme përballë kërcënimit aktual nga Lindja dhe zinxhirët shumëkombëshe të furnizimit.

“Ky është një tjetër hap drejt sigurisë dhe forcës më të madhe të Evropës”, deklaroi ai.