Hagë: Lirohen me kusht Sabit Januzi dhe Ismet Bahtijari

Sabit Januzi dhe Ismet Bahtijari, të dënuar për pengim të drejtësisë dhe frikësim të dëshmitarëve, janë liruar me kusht me urdhër të kryetares së Dhomave të Specializuara të Kosovës (DhSK) në Hagë, Ekaterina Trendafilova.

Sipas njoftimit, vendimi është marrë më 19 shkurt dhe lirimi u mundësua me 21 shkurt me kushte të përcaktuara të cilat do mbesin në fuqi deri në përfundimin dënimeve të dhëna nga trupi gjykues, thuhet në njoftimin e Dhomave të Specializuara.

“Kryetarja konstatoi se, megjithëse veprat penale për të cilat z. Januzi dhe z. Bahtijari u shpallën fajtorë janë padyshim të rënda, duke pasur parasysh pasojat që ka frikësimi i dëshmitarëve për administrimin e drejtësisë, ekzistonin disa faktorë që peshuan në favor të modifikimit të dënimit të tyre”, thuhet në njoftim.

Januzit dhe Bahtijarit u kërkohet që të paraqiten në stacion policor çdo javë, dorëzimi i pasaportës, qëndrimi në Kosovë dhe të lajmërojnë në rast se duan të udhëtojnë jashtë dhe këtë mund ta bëjnë vetëm me leje speciale, të përmbahen nga kontakti me dëshmitarë, të përmbahen nga deklaratat publike direkte ose indirekte rreth Dhomave të Specializuara ose ZPS-së, të paraqesin kërkesë për aprovim nëse duan të kenë intervistë me media, transmeton albinfo.ch.

The post Hagë: Lirohen me kusht Sabit Januzi dhe Ismet Bahtijari appeared first on Albinfo.