Kishat protestante në Zvicër në krizë për staf

Plotësimi i vendeve të lira të punës në kishat protestante të Zvicrës Qendrore është bërë një sfidë serioze. Për të përballuar këtë situatë, gjashtë kantone – Lucerni, Nidvaldeni, Obvaldeni, Schwyzi, Uri dhe Zugu – kanë vendosur të bashkëpunojnë ngushtë në procesin e rekrutimit.

“Është e parashikueshme që shumë pozicione do të duhet të mbushen gjatë viteve të ardhshme,” tha Lilian Bachmann, Presidente e Këshillit Sinodal të Kishës Protestante të Kantonit të Lucernit. “Rreth një e treta e pastorëve do të dalin në pension brenda pesë viteve të ardhshme.”

Bachmann thekson se mungesa e fuqisë punëtore nuk është një fenomen lokal, por shfaqet në mbarë Zvicrën. Ajo shton se shumë njerëz nuk janë të vetëdijshëm për mundësitë interesante që ofrohen në kuadër të kishës: “Kemi vende pune në komunikim, administratë, muzikë apo edhe si organistë. Madje ofrojmë edhe praktikë tregtare.”, trandmeton albinfo.ch.

Një zyrë e re për të mbështetur rekrutimin

Për të përshpejtuar procesin e punësimit dhe për të promovuar më mirë këto mundësi, kishat po krijojnë një zyrë të përbashkët pranë Kishës Protestante të Lucernit. Kjo zyrë do të ofrojë informacione për të interesuarit përmes një platforme reklamuese dhe prezantimi të jetës së përditshme në këto profesione.

“Bashkëpunimi na lejon të bashkojmë burimet dhe të shfrytëzojmë sinergjitë,” shton Bachmann.

Të interesuarit për profesionin e pastorit mund të marrin pjesë në përgatitjen e pagëzimeve, dasmave apo ceremonive mortore, si dhe të vizitojnë shtëpitë e të moshuarve. Kishat gjithashtu planifikojnë pjesëmarrjen në panairin e arsimit ZEBI në Lucern.

Rishikim në vitin 2027

Aktualisht, rreth 500 persona punojnë në mënyrë të përhershme për Kishat Protestante në Zvicrën Qendrore. Bashkëpunimi i ri është parashikuar të zgjasë për dy vjet, dhe në vitin 2027 do të bëhet një vlerësim për të vendosur nëse do të vazhdojë edhe pas vitit 2028.

The post Kishat protestante në Zvicër në krizë për staf appeared first on Albinfo.