Komuniteti Musliman Shqiptar në Zvicër: URIMI PËR FILLIMIN E MUAJIT TË RAMAZANIT

Komuniteti Musliman Shqiptar në Zvicër përcjell urimet më të përzemërta për të gjithë besimtarët myslimanë me rastin e fillimit të muajit të bekuar të Ramazanit.

Në vijim urimi i plotë:

Të nderuar vëllezër e motra!

Komuniteti Musliman Shqiptar në Zvicër informon besimtarët se me perëndimin e diellit të premten, më 28 shkurt 2025, nis muaji i shenjtë i Ramazanit. Dita e shtunë, 01 mars 2025, shënon fillimin e agjërimit për Ramazanin e këtij viti.

Muaji i Ramazanit është një muaj i rëndësishëm për besimtarët muslimanë në mbarë botën. Gjatë këtij muaji, agjërohet nga agimi deri në perëndim të diellit, duke u përmbajtur nga ushqimi, pija dhe nga veprimet negative si shenjë ibadeti dhe përkushtimi ndaj Krijuesit të gjithësisë.

Po ashtu, Ramazani është një mundësi e veçantë për të shprehur mirësinë, për të pastruar zemrat tona dhe për të përmirësuar vetveten, si individë dhe si bashkësi. Në këtë muaj të shenjtë, ne përjetojmë një bashkim të veçantë, që na lidh me njëri-tjetrin dhe me Zotin.

Lutemi që Zoti të na dhurojë paqe dhe siguri, të pranojë agjërimin dhe lutjet tona dhe të na falë mëkatet. Lutemi që njerëzimi të përfitojë nga mësimet që na sjell ky muaj i shenjtë dhe që të ndihmojmë njëri-tjetrin për të arritur një botë më të mirë dhe më paqesore.

Në emër të Komunitetit Musliman Shqiptar në Zvicër, i uroj çdo besimtari e besimtareje dhe çdo qytetari e qytetareje të Zvicrës, një Ramazan të bekuar, plot paqe, dashuri dhe begati.

Për hajr muaji i bekuar i Ramazanit!

Me respekt,

Mehas Alija

Kryetar i KMSHZ-së

The post Komuniteti Musliman Shqiptar në Zvicër: URIMI PËR FILLIMIN E MUAJIT TË RAMAZANIT appeared first on Albinfo.