Lamallari: Dhunuesit gjatë protestës nuk janë protestues, por vandalë
Ministri i Punëve të Brendshme, Besfort Lamallari, e cilësoi dhunën kundër Policisë së Shtetit gjatë protestës së fundit si veprimtari kriminale
Gjatë vizitës në Drejtorinë Vendore të Policisë në Elbasan, Besfort Lamallari theksoi se personat që kanë ushtruar dhunë ndaj forcave të rendit nuk kanë lidhje me të drejtën për protestë, por janë vandalë që do të përballen me pasojat ligjore.
“Një grup, një grusht personash, të cilët me gurë në duar dhunojnë punonjësit e zbatimit të ligjit, çdo punonjës tjetër që kalon aty pranë dhe dëmtojnë pasurinë publike, në fakt nuk janë protestues. Ata janë thjesht vandalë”, u shpreh ministri gjatë takimit.
Ai njoftoi se sipas të dhënave dhe pamjeve të administruara, efektivët e policisë janë goditur me objekte të forta, duke shkaktuar plagosje të disa prej tyre, si dhe janë regjistruar dëmtime të mjeteve dhe pronës publike.
“Unë e pashë vetë atje një punonjës policie, i cili pasi ishte nënshtruar ekzaminimit mjekësor, përmes skanerëve nga ekipi mjekësor, me çarje të theksuar në kokë. Pa dyshim, kurdoherë që janë konstatuar dhe dokumentuar me video, pamjet janë shpërndarë në rrjetet sociale dhe mediat kombëtare. Protestues të quajtur paqësorë, të pretenduar të tillë, dhe nga deputetë të opozitës, në fakt, ishte shumë e qartë se ata po dhunonin punonjësit e Policisë me gurë dhe sende të forta, po intimidonin deputetët e Parlamentit shqiptar për t’u futur në ambientet ku ato janë zgjedhur për të ushtruar detyrën e tyre, si dhe po dhunonin gazetarë”, shtoi Lamallari.
Ministri theksoi se veprimet e tyre nuk kanë të bëjnë fare me protestën, duke i cilësuar si “vandalë që kanë shkelur ligjin”.
Gjatë vizitës, Besfort Lamallari, së bashku me Drejtorin e Përgjithshëm të Policisë së Shtetit, Skënder Hita, inauguruan ambientet e rikonstruktuara të institucionit. Ai theksoi përmirësimin e kushteve të punës për 332 punonjës dhe rritjen e cilësisë së shërbimit ndaj qytetarëve.
Me pak fjalë
Ministri i Punëve të Brendshme, Besfort Lamallari, e cilësoi dhunën kundër Policisë së Shtetit gjatë protestës së fundit si veprimtari kriminale, duke theksuar se vandalët do të përballin pasojat ligjore. Ai njoftoi se janë konstatuar plagosje të policëve dhe dëmtime të pronës publike gjatë incidentit.
Personat e përmendur
Burimi i lajmit: opinion.al
Shënim: Ky material është përpunuar për qëllime informimi nga Portali Kosova.Today.
