Linjat ajrore ndërkombëtare pezullojnë fluturimet drejt Izraelit pas një sulmi nga rebelët Houthi

Disa linja ajrore ndërkombëtare kanë vendosur të pezullojnë përkohësisht fluturimet drejt dhe nga Izraeli, pasi një raketë e lëshuar nga rebelët Houthi në Jemen ra pranë aeroportit ndërkombëtar Ben Gurion në Tel Aviv të dielën.

Ky incident ka shtuar shqetësimet për sigurinë ajrore në rajon, duke detyruar shumë kompani të rishqyrtojnë operacionet e tyre në hapësirën ajrore izraelite. Pezullimet vijnë në një kohë kur fluturimet kishin filluar të rifillojnë gradualisht, pas një marrëveshjeje armëpushimi të arritur në janar ndërmjet Izraelit dhe grupit militant palestinez Hamas.

Gjatë vitit dhe gjysmës së fundit, shumë kompani ajrore kishin pezulluar fluturimet drejt Izraelit për shkak të rrezikut të lartë të sulmeve, që nga sulmi i përgjakshëm i Hamasit më 7 tetor 2023.

Autoritetet izraelite nuk kanë raportuar për viktima apo dëme materiale nga raketa e rënë pranë aeroportit, por tensionet e vazhdueshme në rajon po mbajnë në gatishmëri të lartë linjat ajrore dhe udhëtarët. /abcnews.al