Ministrja e Brendshme: BM duhet ‘të presë dhe të shohë’ nëse Trump ofron shpjegime për tarifat e çelikut

Britania e Madhe do të duhet “të presë dhe të shohë” nëse Donald Trump do të japë shpjegime lidhur me paralajmërimin e tij për të vendosur tarifa për të gjitha importet e çelikut dhe aluminit në Shtetet e Bashkuara të Amerikës, tha ministrja e Brendshme, Angela Eagle.

Në një deklaratë dje në mbrëmje, presidenti amerikan tha se do të vendoste tarifa prej 25% për çdo produkt çeliku që hynte në Shtetet e Bashkuara të Amerikës, duke shtuar se alumini gjithashtu do t’i nënshtrohej detyrimeve shtesë.

Trump nuk dha asnjë detaj, por konfirmoi se po planifikonte të shpallte të martën ose të mërkurën “tarifa të tjera reciproke” për vendet që kanë detyrimet e tyre për produktet amerikane.

Në një reagim ndaj deklaratës së Trump, ministrja e Brendshme, Eagle tha se qeveria do të duhej të priste dhe të shihte nëse presidenti do të bëhej më specifik për atë që nënkuptonte me deklaratën e tij të mbrëmshme.

“Ne kemi një marrëdhënie tregtare shumë të balancuar me SHBA-në – me vlerë 300 miliardë paund (372 miliardë dollarë) midis vendeve tona – dhe mendoj se është në interesin më të mirë të të dy vendeve, si aleatë dhe fqinjë të vjetër, që të vazhdojmë me atë tregti të ekuilibruar”, tha ajo.

Zyrtarët britanikë kuptohet se po kërkojnë detaje të mëtejshme në lidhje me deklaratën e fundit të Trump.

Presidenti Trump ka sugjeruar më herët një marrëveshje për të përjashtuar Britaninë e Madhe nga tarifat, ndërsa pretendon se Londra “po thyen rregullat” në marrëdhëniet e saj tregtare me SHBA-në.