New York/ Kryetari i bashkisë, Eric Adams heq dorë nga rizgjedhja

Kryetari i Bashkisë së Nju Jorkut, Eric Adams hoqi dorë nga rizgjedhja, një veprim i kërkuar prej kohësh nga rivalët e kandidatit demokrat, Zohran Mamdani, të cilët kanë dashur të konsolidojnë opozitën kundër tij, sipas AP.

Adams njoftoi dje vendimin e tij në një video të postuar në X, duke thënë “pavarësisht gjithçkaje që kemi arritur, nuk mund ta vazhdoj fushatën time të rizgjedhjes. Spekulimet e vazhdueshme të medias për të ardhmen time dhe vendimi i bordit të financimit të fushatës për të mbajtur miliona dollarë kanë minuar aftësinë time për të mbledhur fondet e nevojshme për një fushatë serioze”.

“Kjo fushatë ishte për të pashërbyerit, të margjinalizuarit, të braktisurit dhe të tradhtuarit nga qeveria”, tha Adams.

“Që atëherë, ka qenë nder për mua të jem kryetari juaj i bashkisë dhe jam krenar të them se e morëm atë fitore katër vjet më parë dhe e shndërruam në veprim, duke e bërë këtë qytet më të mirë”, theksoi ai.

Vendimi i Adams për t’u larguar nga gara i shton një tjetër kthesë një zgjedhjeje paraprake për kryetar bashkie si asnjë tjetër në kujtesën e kohëve të fundit.

Mamdani, një socialist demokrat, shënoi një fitore të habitshme në zgjedhjet paraprake demokrate të qershorit ndaj ish-guvernatorit të Nju Jorkut, Andrew Cuomo, i cili tani po zhvillon një fushatë të pavarur.

”Njerëzit e fushatës së Cuomos shpresojnë që vendimi i Adams do të çlirojë një pjesë të votës së njerëzve me ngjyrë”, tha një këshilltar duke shtuar se ”besoj se edhe një përqindje e vogël mund ta hapë garën”.