Papa Françesku: Inteligjenca artificiale mund të përkeqësojë krizën në rritje të së vërtetës

Papa Françesku u bëri thirrje udhëheqësve politikë dhe ekonomikë në Forumin Ekonomik Botëror në Davos që të monitorojnë nga afër zhvillimin e inteligjencës artificiale (AI), duke paralajmëruar se teknologjia mund të përkeqësojë “krizën e së vërtetës” në rritje.

Në një deklaratë me shkrim të lexuar në Davos, Papa vlerësoi aftësitë e teknologjisë AI, por paralajmëroi se ajo shkaktoi “shqetësim të madh” për të ardhmen e njerëzimit, raportoi Reuters.

 “Rezultatet që mund të prodhojë inteligjenca artificiale janë pothuajse të njëjta me ato të prodhuara nga njerëzit, gjë që ngre pyetje në lidhje me ndikimin e saj në krizën në rritje të së vërtetës”, tha Papa. Ai theksoi se qeveritë dhe bizneset duhet të jenë të kujdesshme dhe rekomandoi që ata të monitorojnë nga afër zhvillimin e inteligjencës artificiale.

Papa ka nxjerrë në pah aspektet etike që lidhen me inteligjencën artificiale prej disa vitesh. Qershorin e kaluar, në Samitin e Grupit të Shtatë në Itali, ai foli për teknologjinë e AI, duke theksuar se njerëzit nuk duhet t’i lënë algoritmet të vendosin për fatin e tyre./abcnews.al