Guy Parmelin do të marrë pension rreth 239 mijë franga në vit

Presidenti aktual i Konfederatës dhe këshilltari federal Guy Parmelin, pas largimit nga qeveria zvicerane, do të ketë të drejtë në një pension bruto prej 239,083 frangash në vit. Shuma korrespondon me gjysmën e pagës së tij aktuale bruto prej 478,166 frangash në vit, shkruan Ticinonews, transmeton albinfo.ch.

Si funksionon pensioni i këshilltarëve federalë?

Anëtarët e Këshillit Federal, gjyqtarët federalë dhe kancelarët federalë kanë një sistem të veçantë. Në vend të një pensioni tradicional profesional, pas largimit nga detyra ata mund të marrin një pagesë pensionale të lidhur me të ardhurat që kishin gjatë mandatit.

Megjithatë, Parmelin do të humbasë disa nga përfitimet që i ka si anëtar i qeverisë, përfshirë automjetin zyrtar dhe hapësirat e zyrës të financuara nga shteti. Pensioni përshtatet gjithashtu sipas inflacionit.

Një element i rëndësishëm është se pagesa lidhet edhe me të ardhurat pas largimit nga detyra. Nëse ish-këshilltari federal zhvillon aktivitete të tjera fitimprurëse, kjo mund të ndikojë në shumën që merr nga shteti.

Edhe ish-ministrat e tjerë marrin shuma të ngjashme

Sipas TicinoNews, Viola Amherd merr një shumë që i afrohet 240 mijë frangave në vit, Alain Berset pak më pak se 230 mijë, ndërsa Simonetta Sommaruga dhe Ueli Maurer janë në nivelin e rreth 220 mijë frangave në vit.

Sistemi ka qenë objekt debatesh politike në Zvicër. Në qershor 2025, Këshilli Kombëtar refuzoi me 93 vota kundër, 90 pro dhe 3 abstenime një iniciativë që synonte përfshirjen e këtyre zyrtarëve në sistemin e zakonshëm të pensioneve profesionale.

The post Guy Parmelin do të marrë pension rreth 239 mijë franga në vit appeared first on Albinfo.

Burimi i lajmit: albinfo.ch
Shënim: Ky material është përpunuar për qëllime informimi nga Portali Kosova.Today.