Swiss pezullon fluturimet për në Tel Aviv deri në fund të tetorit

Ndërkohë që kompania ajrore kombëtare e Izraelit, El Al, po rifillon orarin e saj të fluturimeve, Swiss mbetet e bllokuar për momentin: Grupi Lufthansa – të cilit i përket Swiss – kishte vendosur që më 13 qershor të pezullojë të gjitha fluturimet për në Tel Aviv dhe nga Tel Avivi, të paktën deri më 31 korrik, transmeton albinfo.ch.

Konpania ajrore zvicerane jo vetëm që e mbështet këtë vendim, por shkon edhe më tej. E kontaktuar nga 20minuten, zëdhënësja e medias Meike Fuhlrott tha: “Swiss nuk do të ofrojë më lidhjen me Tel Aviv në orarin aktual të verës”. Kjo do të thotë se nuk do të ketë fluturime për në Tel Aviv deri të paktën më 25 tetor 2025.

Fluturimet e planifikuara fillimisht për në Bejrut janë gjithashtu të anuluara përkohësisht – fillimisht deri në fund të korrikut.

Swiss përmend me këtë rast nevojën për parashikueshmëri dhe stabilitet operacional si justifikim të saj. Siguria e pasagjerëve dhe ekuipazhit është përparësia e saj kryesore, përcjell albinfo.ch. Swiss është në kontakt të ngushtë me autoritetet përkatëse për këtë çështje. Kompania ajrore po monitoron dhe rivlerëson vazhdimisht situatën.

Swiss synon të rifillojë fluturimet e pezulluara “sa më shpejt të jetë e mundur” – por vetëm në varësi të një vlerësimi të kujdesshëm të sigurisë dhe me angazhimin për të garantuar një orar fluturimi të besueshëm dhe të qëndrueshëm.

The post Swiss pezullon fluturimet për në Tel Aviv deri në fund të tetorit appeared first on Albinfo.