Abdixhiku: Presim rezultatet, LDK do të ofrojë qëndrimet e veta politike

Kryetari i Lidhjes Demokratike të Kosovës, Lumir Abdixhiku ka thënë se rritja e kësaj partie i jep mundësi e qetësi organizimit më të mirë të brendshëm partiak, dhe për këtë është shprehur krenar.

Përmes një postimi në rrjetet sociale, ai ka shprehur keqardhje që kjo rritje është e pamjaftueshme.

“Të gjithë votuesve tanë, ju faleminderit që mbështetët Lidhjen tonë. Të gjithë qytetarëve të Kosovës, ju faleminderit që nderuat demokracinë e atdheut tonë. Të gjithë veprimtarëve tanë ju faleminderit që punuat me kaq vullnet e me kaq emocion në këto zgjedhje. Asgjë mangut! Punuam mbarë. Ecëm drejtë.  Ecëm si qytetarë me ëndrra të mëdha për këtë Republikë. Shpresoj të ju kem prirë mbarë; shpresoj të ju kem përfaqësuar siç keni merituar gjithnjë! E shoh me plot krenari rrugëtimin e bërë deri më tani. Nuk dijmë ndryshe, nuk duam ndryshe, nuk duhet ndryshe. Rritja jonë i jep mundësi e qetësi organizimit më të mirë të brendshëm partiak – dhe për këtë do të qëndroj gjithmonë krenar; por kjo rritje është e pamjaftueshme për ndryshimin e Republikës në këtë fazë – dhe për këtë ndjejë keqardhje”, ka shkruar ai, transmeton albinfo.ch.

Tutje, ai ka deklaruar se pas numërimit përfundimtar të votave, LDK do të ofrojë qëndrimet e veta politike.

“Pavarësisht të gjithave, Do të ketë dritë! Në këtë fazë, vazhdojmë me numërimin e votave të mbetura; sidomos ato në mërgatë. Pas numërimit përfundimtar, LDK do të ofrojë qëndrimet e veta politike”, ka shtuar tutje ai.

The post Abdixhiku: Presim rezultatet, LDK do të ofrojë qëndrimet e veta politike appeared first on Albinfo.